Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 192 Hüküm no: 166 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Hacı Mustafa’nın Abdülvehhab Çelebi b. Mustafa’dan satın aldığı değirmenin satışını iptal ettikleri Mahmiye-i İstanbul’da Kasab İvaz Mahallesi’nde sâkin Mehmed Efendi [b.] el-Hâc Mustafa meclis-i şer‘-i şerîf-i enverde yine mahmiye-i mezbûrede Hoca Kasım Gönânî Mahallesi’nde sâkin el-Hâc Bektaş b. Mustafa’nın vekîl-i müsecceli olan Abdülvehhab Çelebi b. Mustafa mahzarında ikrâr ve takrîr-i kelâm edip müvekkil-i mezbûr el-Hâc Bektaş arsası Hüsameddin Vakfı’ndan beher mâh yüz on beş akçe müeccele ile vakıf ve üzerinde ebniyesi kendi mâlıyla binâ ve ihdâs eylediği yine mahmiye-i mezbûrede Odabaşı çarşısı demekle ma‘rûf mahalde vâki‘ iki çarh horos değirmenini bundan akdem yedi yüz guruşa bana bey‘ ve teslîm ve kabz-ı semen etmişidi hâlâ rızâmız ile bey‘-i mezbûru fesh ve ikāle edip değirmen-i mezbûru merkūm el-Hâc Bektaş’a teslîm ol dahi semeni olmak üzere makbûzu olan yedi yüz guruşu bana teslîm ben dahi yedinden ahz u kabz edip min-ba‘d husûs-ı mezbûra müte‘allika birbirimiz ile aslâ da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Kolcu Mustafa Çelebi b. ( ), Mehmed Çelebi b. ( ), Mustafa Çelebi b. ( ), Yahya Çelebi b. ( ), Abdullah Çelebi b. Abdullah, Süleyman Çelebi b. Abdullah, Hamza Efendi b ( ) ve gayruhum mine’l-huzzâr.