Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 193 Hüküm no: 167 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasandıra bt. Hristo’nun evinin yarısını Marko v. Sava’ya sattığı Mahmiye-i İstanbul’da Altımermer kurbünde Seydî Ömer Mahallesi sâkinelerinden Kasandıra bt. Hristo nâm Nasrâniye tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân Kosta v. Atnaş ve Papa Hristodolo v. Papa Kiryaki nâm zimmîler şehâdetleriyle şer‘an sâbit olan Dimitri v. Hristo nâm zimmî meclis-i şer‘-i şerîf-i enverde işbu râfi‘u’l-vesîka Marko v. Sava nâm zimmî muvâcehesinde bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezkûrenin yedinde mülk ve hakkı olup mahalle-i mezkûrede vâki‘ bir tarafdan Kosti nâm zimmî mülkü ve bir tarafdan Derviş Osman Efendi mülkü ve bir tarafdan Esirci Mustafa mülkü ve bir tarafdan tarîk-i âm ile mahdûd fevkānî üç bâb oda ve bir sofa ve bir kenîf ve tahtânî iki bâb oda ve bir kiler ve bir müşterek su kuyusu ve bir kenîf ve havluyu müştemil mülk menzilden nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezkûr Marko’ya yüz yetmiş beş guruşa bey‘ ve temlîk ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan meblağ-ı mezkûr yüz yetmiş beş guruşu mezkûr Marko yedinden tamamen ahz u kabz eyleyip baʻde’l-yevm menzil-i mahdûd-ı mezkûrun nısf-ı şâyi‘i mezkûr Marko’nun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 5 min-Cumâdelûlâ sene 1121 Şuhûdü’l-hâl: Mehmed Efendi b. Mehmed el-İmâm, Mehmed Halîfe el-Müezzin, Mustafa Efendi el-İmâm, Mustafa Çelebi b. Süleyman, Mustafa Çelebi b. Mehmed, el-Hâc Hüseyin b. Abdullah, Mustafa Çelebi el-Müezzin, Yusuf Çelebi b. Abdülkerim, Osman Çelebi b. Ali, Mehmed Çelebi b. Abdullah ve gayruhum mine’l-huzzâr. Papa Hristo v. Kiryaki, Tanaş v. Sofyanos, Atanaş v. Taman, Kosta v. Tanaş, Panayonaki v. Yani, Hürmüz v. Kiryazi.