Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 193 Hüküm no: 168 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun bt. Ömer’in geçinemediği kocası Murtaza Bey b. Abdullah’dan boşandığı Mahmiye-i İstanbul’da Ali Paşa-yı Atîk Mahallesi’nde sâkine olup zâtı Ahmed Beşe b. Hüseyin ve Hüseyin b. Mehmed nâm kimesneler ta‘rîfleriyle mu‘arrefe olan Ümmügülsüm bt. Ömer nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Murtaza Bey b. Abdullah nâm kimesne mahzarında ikrâr ve takrîr-i kelâm edip mezbûr Murtaza Bey zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve mezbûrun firâşından hâsıl ve benden mütevellid hâlâ bi-hakkı’l-hıdâne hacr u terbiyemde olan sadrî sagīr oğlum Osman’a yedi yaşına değin kendi mâlımdan infâk ve iksâ etmek üzere ve meûnet-i süknâm dahi kendi üzerime olmak üzere zevcim mezbûr Murtaza Bey ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Cumâdelûlâ sene 1121 Şuhûdü’l-hâl: Ahmed Beşe b. Hüseyin, Ahmed Çelebi b. Mehmed, Hüseyin Çelebi b. Mehmed, Ebûbekir Çelebi b. Ahmed, İbrahim Çelebi b. Abdullah, Ali Çelebi b. Bâli, Mustafa Çelebi b. Şa‘ban, Hasan Çelebi b. Mustafa, Hüseyin Çelebi b. Abdullah, Osman Çelebi b. Hasan, Süleyman b. Abdullah, Ali b. İvaz ve gayruhum mine’l-huzzâr.