Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 194 Hüküm no: 169 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muammer Hatun bt. Abdullah ile damadı Hüseyin Beşe b. Yakub’un evlerini Seyyid Ahmed Çelebi b. Hasan’ın zapt ettikleri iddiasıyla açtıkları davada haksız bulundukları Mahmiye-i İstanbul’da Mimâr Sinan Mahallesi’nde sâkine Muammer bt. Abdullah nâm hatun asâleten ve damadı Hüseyin Beşe b. Ya‘kub tarafından husûs-ı âti’l-beyâna vekîl-i müsecceli olan el-Hâc Mustafa b. Halil nâm kimesne vekâleten mahfil-i kazâda zikri âtî menzile vâzı‘u’l-yed olan işbu râfi‘u’l-kitâb es-Seyyid Ahmed Çelebi b. Hasan mahzarında her biri üzerine da‘vâ ve takrîr-i kelâm edip merhûm Süleyman Efendi Vakfı’ndan olup [23b] mahalle-i mezbûrede vâki‘ bir tarafdan İlâhizâde nâm kimesne menzili bahçesi ve bir tarafı Sâliha Hatun menzili ve bir tarafdan Ali Beşe menzili ve bir tarafdan tarîk-i hâs ile mahdûd menzil icâreteyn-i ma‘lûmeteyn ile tasarrufumuzda iken mezbûr es-Seyyid Ahmed bi-gayr-ı hakkın vaz‘-ı yed eder suâl olunsun dedikde gıbbe’s-suâl mezbûr es-Seyyid Ahmed cevâbında kaziyye minvâl-i muharrer üzere olup lâkin mezbûrân Hüseyin Beşe ve Muammer temessük nâtık olduğu üzere bin yüz on sekiz senesi Zilka‘de’si gurresinde bâ-izn-i mütevellî altmış guruş bedel mukābelesinde bana ferağ ve tefvîz ben dahi tefevvüz ve kabûl ve bedel-i ferağı kendilere edâ ve teslîm edip hattâ meblağ-ı mezbûru benden kabzlarını ikrâr dahi etmişler idi deyü def‘le mukābele edicek isre’l-istintak ve’l-inkâr mezbûr es-Seyyid Ahmed’den def‘-i mezkûruna beyyine taleb olundukda udûl-i Müslimînden mahalle-i Serv[i] sâkinlerinden es-Seyyid Osman b. Mehmed ve Ömer b. Mehmed nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka mezbûrân Hüseyin Beşe ve Muammer bundan akdem menzil-i mahdûd-ı mezkûru altmış guruş bedel mukābelesinde mezbûr es-Seyyid Ahmed’e ferağ ve tefvîz ve bedel-i ferağ olan altmış guruşu yedinden ahz u kabz eyledik deyü bizim huzûrumuzda ikrâr ve bizi işhâd eylediler biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iyân-ı mezbûrân bî-vech mu‘ârazadan men‘-birle mâ-vaka‘a bi’t-taleb ketb olundu. Fî 26 min-Rebîʻülâhir sene 1121 Şuhûdü’l-hâl: Es-Seyyid Mehmed Çelebi b. ( ), el-Hâc Mustafa Efendi b. ( ), es-Seyyid Derviş Mehmed Çavuş el-Mübâşir, el-Hâc Mehmed b. ( ), es-Seyyid Salih Çelebi b.( ), Süleyman Ağa Ser-muhzırân, Hüseyin Beşe Çukadâr, Halil Çelebi b. ( ), Abdullah Efendi el-İmâm ve gayruhum mine’l-huzzâr.