Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 195 Hüküm no: 170 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı Hokaz v. Mardiros’un kireç ve horasan bedelinden Osman Ağa b. Abdullah’da olan alacağının ödenmesi Horasancı tâifesinden işbu râfi‘u’s-sifr Hokaz v. Mardiros nâm zimmî mahfil-i kazâda Osman Ağa b. Abdullah nâm kimesne mahzarında üzerine da‘vâ ve takrîr-i kelâm edip mezbûr Osman Ağa zimmetinde bundan akdem yedimden iştirâ ve kabz eylediği beynimizde ma‘lûm horasan ve kireç ve yağlı kireç bahâlarından yirmi beş bin akçe hakkım olup hattâ meblağ-ı mezbûr bana deyni olduğunu alâ-re’si’l-işhâd ikrâr ve işhâd dahi etmekle suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda udûl-i Müslimînden olup mahmiye-i İstanbul’da Hâcehatun Mahallesi sükkânından İbrahim b. Halil ve Arabacılar Mahallesi’nde sâkin Süleyman b. Ahmed nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka işbu mezbûr Osman Ağa bundan akdem müdde‘î-i merkūm Hokaz’a zikr olunan horasan ve kireç bahâlarından yirmi beş bin akçe zimmetinde deyni olduğunu bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr yirmi beş bin akçeyi müdde‘î-i merkūma edâ ve teslîme mezbûr Osman Ağa’ya tenbîh-birle mâ-vaka‘a bi’t-taleb ketb olundu. Fî-gurreti Cumâdelûlâ sene 1121 Şuhûdü’l-hâl: el-Hâc Mustafa Efendi tâbi‘-i efendi, el-Hâc Hasan b. Osman Çukadâr, el-Hâc Mehmed Çelebi b. ( ), el-Hâc Ali b. ( ) tâbi‘-i efendi, Abdullah Efendi b. ( ) İmâm Efendi, Hüseyin Çelebi b. Ömer.