Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 196 Hüküm no: 171 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Halil b. Hüseyin’in arsası Alaeddin Câmii Vakfı’na ait mülk binasını Emine bt. Hacı Ebûbekir’e sattığı Mahmiye-i İstanbul’da Sofular Mahallesi’nde sâkin el-Hâc Halil b. Hüseyin nâm kimesne mahfil-i kazâda işbu râfi‘atü’l-vesîka Emine bt. el-Hâc Ebûbekir nâm hatunun zevci ve tarafından husûs-ı âti’l-beyânı tasdîka vekîl-i şer‘îsi olan el-Hâc Mehmed Emin Efendi b. eş-Şeyh Müstakīm Efendi mahzarında ikrâr ve takrîr-i kelâm edip arsasının senede Şeyh Alâeddin Câmi‘-i şerîfi’ne yüz elli akçe mukāta‘a-i kadîmesi olup ebniyesi akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan hamam külhanı ve bir tarafdan Şeyh Alâeddin Câmi‘-i şerîfi ve bir tarafdan yine benim âhar mülküm ve bir tarafdan tarîk-i âm ile mahdûd fevkānî bir bâb oda ve bir sofa ve bir kenîf ve tahtânî bir matbah ve müşterek su kuyusu ve etrâf-ı selâsesi taş duvar ve mâ-beyninde olan dolma duvar müşterek olan ebniye-i memlûkemi müvekkile-i mezbûreye tarafeynden îcâb ve kabûlü hâvî bey‘-i kat‘î ile üç yüz yirmi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr üç yüz yirmi guruşu müvekkile-i mezbûre yedinden tamamen ahz u kabz eyledim baʻde’l-yevm menzil-i mahdûd-ı mezkûrun ebniye-i memlûkesi müvekkile-i mezbûrenin mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Cumâdelûlâ sene 1121 Şuhûdü’l-hâl: Ahmed Efendi b. Muharrem, eş-Şeyh Feyzullah Efendi b. eş-Şeyh Müstakīm Efendi, el-Hâc Mahmud b. Emin Efendi, Müezzin Abdullah Efendi b. Receb, Molla İbrahim b. Abdullah, el-Hâc Musa b. İbrahim, Mustafa Çelebi b. Mehmed, Abdülbâki Çelebi b. Mehmed.