Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 197 Hüküm no: 173 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pazarcı Halil Çelebi b. İbrahim’in vefât eden Ahmed b. Mustafa b. Ahmed’de olan alacağının terekeden ödenmesi Pazarcı tâifesinden işbu râfi‘u’r-rakīm Halil Çelebi b. İbrahim nâm kimesne mahfil-i kazâda medîne-i Üsküdar muzâfâtından Adalar nâhiyesine tâbi‘ Odunlu nâm karye sâkinlerinden bundan akdem vefât eden Ahmed b. Mustafa b. Ahmed nâm kimesnenin verâseti zevcesi Emine bt. Abdullah nâm hatun ile sulbî kebîr oğulları İsmail ve İbrahim ve sulbiye sagīre kızı Rukiye’ye münhasıra olduğu şer‘an zâhir ve mütehakkık oldukdan sonra müteveffâ-i mezbûrun terekesine bi’l-verâse vâzı‘u’l-yed olan mezbûr İbrahim mahzarında üzerine da‘vâ ve takrîr-i kelâm edip müteveffâ-i mezbûr Ahmed zimmetinde cihet-i deyn-i şer‘îden yüz otuz guruş hakkım olup hattâ meblağ-ı mezbûr zimmetinde bana deyni olduğunu târih-i kitâbdan beş ay mukaddem hâl-i hayâtında ve nefâz-ı tasarrufâtında alâ-re’si’l-işhâd ikrâr ve işhâd dahi ettiğinden sonra meblağ-ı mezbûrun otuz altı guruşunu ahz u kabz edip bâkī doksan dört guruşunu kable’l-edâ vefât etmekle mezbûr İbrahim’e suâl olunup terekesinden bana edâya tenbîh olunmak matlûbumdur dedikde gıbbe’s-suâl mezbûr İbrahim cevâbında tereke-i müteveffâ-i mezbûra bi’l-verâse vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i İstanbul’da Karabaş Mahallesi’nde sâkin el-Hâc Mustafa b. Mehmed ve Müftî Ali Çelebi Mahallesi’nde sâkin es-Seyyid Halil Çelebi b. es-Seyyid Mehmed ve Yusuf b. Hasan nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka müteveffâ-i mezbûr Ahmed b. Mustafa b. Ahmed hâl-i hayâtında ve nefâz-ı tasarrufâtında târih-i kitâbdan beş ay mukaddem işbu müdde‘î-i mezbûr Halil b. İbrahim’e edâsı lâzım yüz otuz guruş deynim vardır deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr Halil tahlîf-i şer‘î ile tahlîf olunmağın mûcebince baʻde’l-hükm meblağ-ı bâkī-i mezbûr doksan dört guruşu müteveffâ-i mezbûrun terekesinden müdde‘î-i mezbûra edâ ve teslîme merkūm İbrahim’e tenbîh-birle mâ-vaka‘a bi’t-taleb ketb olundu. Fî-gurreti Cumâdelûlâ sene 1121 Şuhûdü’l-hâl: Mustafa b. Şa‘ban, Ali Çelebi b. İvaz, Hasan Çelebi b. Mustafa, Osman b. Hasan, Mehmed b. Mehmed ve gayruhum mine’l-huzzâr.