Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 198 Hüküm no: 174 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Mehmed’in, Aslan v. Bono’da olan ipek bedelinden alacağının ödenmesi Mahmiye-i İstanbul’da Kebeciler Hanı’nda müsâfiren sâkin işbu râfi‘u’l-kitâb Ömer Çelebi b. Mehmed nâm kimesne mahfil-i kazâda Aslan v. Bono nâm Yahûd[i] muvâcehesinde üzerine da‘vâ ve takrîr-i kelâm edip mezbûr Aslan Yahûdi yedimden iştirâ ve kabz eylediği vezni beynimizde ma‘lûm ipek bahâsından yüz altmış dört guruş hakkım olup mukābelesinde emlâkinden bir samur kürk ve bir kutnî kaftan ve bir çuka kaplı kedi kürkü ve bir sırmalı hamam rahtı ve bir peştamâl ve bir boğçasını mezbûr Aslan bana rehin vaz‘ ve teslîm ben dahi ber-vech-i muharrer ahz u kabz etmişidim hâlâ mezbûra suâl olunup rihân-ı mezbûreyi yedimden baʻde’l-fek meblağ-ı mezbûr yüz altmış dört guruşun mezbûr Aslan’dan alıverilmesi matlûbumdur dedikde gıbbe’s-suâl mezbûr Aslan cevâbında fi’l-hakīka kaziyye vech-i muharrer üzere olup cihet-i mezbûreden müdde‘î-i merkūma el-ân edâsı lâzım meblağ-ı mezkûr yüz altmış dört guruş zimmetimde deynim olup mukābelesinde eşyâ-i muharrere-i mezbûreyi rehin vaz‘ etmişidim deyü meblağ-ı merkūmu ikrâr u i‘tirâf etmeğin alâ-mûcebi i‘tirâfihî rihân-ı mezbûreyi fek ile meblağ-ı mezbûru müdde‘î-i merkūma edâ ve teslîme merkūm Aslan Yahûdiye tenbîh olunup mâ-vaka‘a bi’t-taleb ketb olundu. Fî 3 min-Cumâdelûlâ sene 1121 Şuhûdü’l-hâl: Mehmed b. ( ) el-Mübâşir, Mustafa Çelebi b. Şa‘ban, Osman Çelebi b. Hasan, Hasan Çelebi b. Mustafa ve gayruhum mine’l-huzzâr.