Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 199 Hüküm no: 176 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Hürmüz’ün kendisini darp edip yaralayan Dimitri’nin çocukları Yani ve İstefan ile sulh oldukları Mahmiye-i İstanbul’da ( ) Mahallesi’nde sâkin Yanaki v. Hürmüz nâm zimmî mahfil-i kazâda mahmiye-i mezbûrede Ayakapısı hâricinde sâkinler olan işbu râfi‘u’s-sifr Yani ve karındaşı İstefan nâm zimmîlerin babaları ve taraflarından husûs-ı âti’z-zikri tasdîka vekîl olduğu bi-mâ-hüve nehci’s-sübût şer‘an sâbit olan Dimitri v. İstefan nâm zimmî muvâcehesinde ikrâr ve takrîr-i kelâm edip müvekkilân-ı mezbûrân Yani ve İstefan târih-i kitâbdan bir gün mukaddem zikri mürûr eden Ayakapısı hâricinde baʻde’l-asr bi-gayr-ı hakkın yumruk ile beni darbedip yüzüm ve gözüm mecrûh etmişler idi deyü mûceb-i şer‘îsini müvekkilân-ı mezbûrândan taleb ve da‘vâ sadedinde olmuşidim el-hâletü hâzihî beynimize [24b] muslihûn tavassut edip da‘vâ-yı mezkûremden müvekkilân-ı mezbûrân Yani ve İstefan ile beni sekiz guruş üzerine sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûr sekiz guruşu müvekkilân-ı mezbûrân yedlerinden tamamen ahz u kabz eyledim baʻde’l-yevm husûs-ı mezkûra ve mâ yuhdesü anhâya müte‘allika âmme-i da‘vâdan müvekkilân-ı mezbûrân Yani ve İstefan’inin zimmetlerinin ibrâ-i âmm-ı kātıʻu’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Cumâdelûlâ sene 1121 Şuhûdü’l-hâl: Mübâşir Mustafa Çavuş, el-Hâc Mehmed b. Hasan, Ali Çelebi b. İvaz, Hasan b. Mustafa, Ali b. Bâli ve gayruhum mine’l-huzzâr.