Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 200 Hüküm no: 177 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım bt. Ali Ağa’nın bir nalbant dükkanı ile bir arsadaki hisselerini Fâtıma Hanım bt. İbrahim Ağa’ya sattığı Mahmiye-i İstanbul’da Debbâğ Yunus Mahallesi sâkinelerinden Emine Hanım bt. Ali Ağa tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân İbrahim Çelebi b. Abdullah ve Ahmed Çelebi b. Ali şehâdetleriyle şer‘an sâbit olan Gülyub bt. Abdullah nâm hatun meclis-i şer‘-i şerîf-i enverde ve mahfil-i dîn-i münîf-i ezherde li-ebeveyn karındaşı kızı Fâtıma Hanım bt. İbrahim Ağa’nın vekîl-i müsecceli olan el-Hâc Mes‘ûd b. Ramazan muvâcehesinde bi’l-vekâle ikrâr ve takrîr-i kelâm edip Eyüb Sultan Vakfı’ndan olup Topçular nâm mevzi‘de vâki‘ ma‘lûmü’l-hudûd bahçe arsasından sekiz sehmden bir sehm-i şâyi‘i ile yine mahalle-i mezkûrede vâki‘ Sultan Bayezid Vakfı’ndan olup na‘lband dükkânında olan sekiz sehmden bir sehm-i şâyi‘ini vakfeyn-i mezkûreyn mütevellîleri izin ve ma‘rifetleriyle on guruş bedel mukābelesinde mezkûre Fâtıma Hanım’a ferağ ve tefvîz ol dahi ber-vech-i meşrûh tefevvüz ve kabûl eylediğinden sonra bedel-i mezkûr on guruşu mezkûre Fâtıma Hanım yedinden ahz u kabz eyledi baʻde’l-yevm zikr olunan bahçe arsasında ve na‘lband dükkânında olan bir sehm hisse-i şâyi‘aları mezkûre Fâtıma Hanım’ın hakk-ı müfevvazı olup müvekkilem mezkûre Emine Hanım’ın alâka ve medhali kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 4 min-Cumâdelûlâ sene 1121 Şuhûdü’l-hâl: Abbas Ağa b. Abdullah, Hasan Çelebi b. Mustafa, Süleyman Çelebi b. Receb, Mustafa Çelebi b. Şa‘ban ve gayruhum mine’l-huzzâr.