Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 201 Hüküm no: 178 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Hâfız Mehmed Efendi b. Hüseyin’in evini Ali Paşa-yı Atîk Mahallesi Avârız Vakfıʼna istiğlâl yoluyla sattığı Mahmiye-i İstanbul’da Ali Paşa-yı Atîk Mahallesi’nde sâkin fahrü’l-kuzât Hâfız Mehmed Efendi b. Hüseyin nâm kimesne meclis-i şer‘-i şerîf-i enverde mahalle-i mezbûre avârızına mevkūfe nukūdun bi’l-fi‘il mütevellîsi olan işbu râfi‘u’l-kitâb Ali Çelebi b. Receb nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Sivasî Hüseyin Çelebi menzili ve baʻzan Yusuf Çelebi menzili ve bir tarafdan Ahmed Beşe menzili ve bir tarafdan İvaz Hatun menzili ve bir tarafdan tarîk-i âm ile mahdûd büyût-ı adîdeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık mütevellî-i mezbûr Ali Çelebi’ye bi-tarîkı’l-istiğlâl iki yüz guruşa bey‘ ve teslîm ol dahi ber-vech-i muharrer mâl-ı vakf-ı mezbûr ile iştirâ ve tesellüm ve kabz ve kabûl eylediğinden sonra semeni olan meblağ-ı mezbûr iki yüz guruşu mütevellî-i mezbûr Ali Çelebi bana def‘ ü teslîm ben dahi yedinden tamamen ahz u kabz eylediğimden sonra mütevellî-i mezbûr Ali Çelebi menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin otuz guruşa yine bana îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Cumâdelûlâ sene 1121 Şuhûdü’l-hâl: Ahmed Efendi b. Ali el-Müezzin, el-Hâc Mustafa b. Abdullah, Mustafa Çelebi b. Durmuş, İbrahim Çelebi b. Mustafa, Mehmed Çelebi b. Ali, Sunullah Efendi b. Abdullah el-Kādı, Ali Çelebi b. İvaz Muhzır, Ali b. Bâli Muhzır.