Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 201 Hüküm no: 179 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Hacı Mustafa’nın evini Keşkek Mustafa Efendi Nukud Vakfıʼna istiğlâl yoluyla sattığı Mahmiye-i İstanbul’da Tevkī‘î Ca‘fer Mahallesi sükkânından Ali Ağa b. el-Hâc Mustafa nâm kimesne mahfil-i kazâda merhûm Keşkek Mustafa Efendi nukūd-ı mevkūfesine bi’l-fi‘il mütevellî olan hâfızu hâze’l-kitâb Abdullah Çelebi b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Şemsi Ahmed Efendi menzili ve bir tarafdan Şeyhî Mehmed Ağa menzili ve bir tarafdan Hadice Hatun menzili ve bir tarafdan tarîk-i âm ile mahdûd hâricen ve dâhilen büyût-ı adîdeyi müştemil mülk menzilimi cümle tevâbi‘ ve levâhıkı ile mütevellî-i mezbûr Abdullah Çelebi’ye bi-tarîkı’l-istiğlâl sekiz yüz yirmi guruşa bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezbûr sekiz yüz yirmi guruşu mütevellî-i merkūm yedinde olan mâl-ı vakf-ı mezbûrdan bana def‘ ü teslîm ben dahi yedinden baʻde’l-kabz mütevellî-i merkūm Abdullah Çelebi menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin seksen iki guruşa bana îcâr ve teslîm ben dahi istîcâr ve kabz ve kabûl eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Muharremi’l-harâm sene 1121 Şuhûdü’l-hâl: Osman Efendi b. Mehmed el-İmâm, Monla İbrahim b. Yusuf, Monla Abdurrahman, Monla Mustafa Efendi, Abdullah Efendi b. Mehmed Efendi, Ali b. İvaz, Hasan b. Mustafa, Abdullah el-Muhzır.