Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 202 Hüküm no: 180 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Yazıcı b. Davud’un alacaklısı olduğu yazıcısı Halil Çelebi b. Hacı Ahmed’le sulh olup birbirlerinin zimmetini ibra ettikleri Mahmiye-i İstanbul’da Cibalikapısı kurbünde Seferikoz Mahallesi’nde sâkin Mehmed Yazıcı b. Davud meclis-i şer‘-i şerîf-i enverde mukaddemâ yazıcısı olan işbu râfi‘u’l-kitâb Halil Çelebi b. el-Hâc Ahmed mahzarında ikrâr ve takrîr-i kelâm edip mezbûr Halil Çelebi yazıcım olmağla zimem-i nâsdan cem‘ ve tahsîl eylediği akçeden yirmi bin iki yüz akçesini kendi mesârifine sarfla istihlâk edip yedime meblağ-ı mezbûr cihet-i karzdan deynimdir deyü temessük vermişidi deyü meblağ-ı mezbûru merkūm Halil Çelebi’den taleb ve da‘vâ eylediğimde ol dahi beynimizde olan hesâbda galat vâki‘ olmağla temessük-ı mezbûr sehven verilmişidi deyü nizâ‘a tasaddî etmekle beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî beynimize muslihûn tavassut edip meblağ-ı mezbûr mutâlebesinden beni mezbûr Halil Çelebi ile beş bin yedi yüz akçeye sulh eylediklerinde ben dahi sulh-ı mezbûru kabûl eylediğimden sonra bedel-i sulh-ı mezbûr el-ân dahi mezbûr Halil Çelebi yedinde olmağla bedel-i sulh-ı mezbûrdan mâ‘adâ on dört bin beş yüz akçeye ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ben mezbûr Halil Çelebi’nin zimmetini ibrâ-i âm ile ibrâ ve iskāt edip ol dahi ücretine ve sâir târih-i kitâba gelince âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Hasan b. Mustafa, Ali b. Bâli, Süleyman b. Abdullah, Hasan b. Abdullah ve gayruhum mine’l-huzzâr.