Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 203 Hüküm no: 181 Orijinal metin no: [24b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatun Mescidi Vakfı’ndan Derviş Ali Mahallesi’ndeki odanın kiracısı Osman Hoca b. Ahmed’in on beş senedir ortada olmadığından odanın başkasına kiralanmasına izin verildiği Mahmiye-i İstanbul’da Beyceğiz Mahallesi’nde vâki‘ ashâb-ı hayrâtdan merhûme Şerife Hatun nâm sâhibetü’l-hayrın mescid-i şerîfinin bi’l-fi‘il mütevellîsi olan işbu bâ‘isü’l-kitâb Hüseyin Efendi b. Mustafa nâm kimesne mahfil-i kazâda takrîr-i kelâm ve tâʻbir ani’l-merâm edip vakf-ı mezbûr musakkafâtından olup mahmiye-i mezbûrede Derviş Ali Mahallesi’nde Mehmed Ağa hamamı külhanı mukābelesinde vâki‘ müteʼehhilîn odalarından beher şehr kırkar akçe icâre-i müeccele ile ma‘lûmü’l-hudûd bir bâb odaya mutasarrıf olan Osman Hoca b. Ahmed nâm kimesne on beş seneden mütecâviz diyâr-ı âhara gidip [25a] sâlifü’z-zikr odanın on beş senede müctemi‘ olan altmış guruş icâresi cânib-i vakfa verilmediğinden mâ‘adâ mürûr-ı eyyâm ile harâba müşrif olup vakfa gadr ve zarâr terettüb etmekle husûs-ı mezbûr işbu hâzirûn bi’l-meclis olup vukūf-ı tâmları olan bî-garaz Müslimînden baʻde’l-istihbâr ber-vech-i muharrer oda-i mezbûru ecr-i misli ile âhara icâra cânib-i şerî‘at-i garrâdan bana izin verilmesi bi’t-tevliye matlûbumdur dedikde mahalle-i mezbûre ahâlîsinden ve bî-garaz Müslimînden husûs-ı mezbûra vukūf-ı tâmları olan Mehmed Efendi b. Hüseyin ve Ali Çelebi b. İsmail ve Mehmed Çelebi b. Yahya ve Mustafa Çelebi b. Mehmed ve Mustafa Beşe b. Hasan ve Hasan b. Hüseyin ve Mehmed Halîfe b. Habib ve el-Hâc Mustafa b. Abdullah ve Ahmed Efendi b. Mehmed ve Ali Efendi b. Hasan ve Ömer Halîfe b. Şükrullah ve Mehmed Çelebi b. Mustafa nâm kimesneler meclis-i şer‘a hâzirûn olup husûs-ı mezbûr istihbâr olundukda fi’l-vâki‘ vakf-ı mezbûrdan olup beher şehr kırkar akçe icâre-i müeccele ile mârru’z--zikr odaya mutasarrıf olan Osman Hoca b. Ahmed on beş seneden mütecâviz diyâr-ı âhara gidip on beş seneden berü bu âna gelince oda-i mezkûrenin icâresi cânib-i vakfa verilmeyip oda-i mezbûre harâba müşrif olup taraf-ı vakfdan ecr-i misli ile âhara îcâr olunması cânib-i vakfa evlâ ve enfa‘dır deyü her biri alâ-tarîkı’ş-şehâde haber verip ve husûs-ı mezkûr için mütevellî-i mezbûr Hüseyin Efendi yedine verilen i‘lâm mûcebince fermân-ı âlî dahi sâdır olmağın mûcebince oda-i mezbûru vech-i meşrûh üzere ecr-i misli ile âhara icâra mütevellî-i mezbûr Hüseyin Efendi’ye kıbel-i şer‘den izin verilmeğin mâ-vaka‘a bi’t-taleb ketb olundu. Fî-selhi Rebîʻülâhir sene 1121 Şuhûdü’l-hâl: Mehmed Çelebi b. Ahmed, Oturakçı Mustafa b. ( ), Turşucu Ali b. ( ), Molla Hasan b. ( ), Derzi Mahmud b. ( ), Mehmed Efendi b. ( ) ve gayruhum mine’l-huzzâr.