Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 204 Hüküm no: 182 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud Mahallesi’ndeki çeşme ile Ebûbekir Paşa Camii Çeşmesi’ne Küçükköy karyesindeki kuyu sularından her birine 1,5 masura su verilmesi Mahmiye-i İstanbul’da vâki‘ Ebûbekir Paşa Mahallesi imâmı Ahmed Efendi ve civârında vâki‘ Koruk Mahmud Mahallesi ahâlîsinden İmâm Feyzullah Efendi b. Mahmud ve Mehmed Çavuş b. Mustafa ve Ahmed b. Mehmed ve Mehmed b. Hasan nâm kimesneler ve sâirleri mahfil-i kazâda takrîr-i kelâm ve tâʻbir ani’l-merâm edip zikr olunan Ebûbekir Paşa Mahallesi Câmi‘-i şerîfi çeşmesi yirmi beş seneden mütecâviz harâba müşrif olmağla hâlâ mesned-ârâ-yı Sadâret-i uzmâ ve zînet-efzâ-yı vekâlet-i kübrâ sâhibü’l-hayrât ve’l-hasenât tâlibü’s-sadakāt ve’l-meberrât devletlü sa‘âdetlü Ali Paşa yesserrallâhu mine’d-dâreyni mâ yürîdü ve mâ-yeşâ hazretlerine arzuhâl ettiğimizde Hâslar kazâsına tâbi‘ Küçükköy demekle ma‘rûf karye kurbünde müceddeden ihrâc olunan kuyuların suyundan bir mikdâr su ile çeşme-i mezkûru ihyâ buyrulmak bâbında fermân-ı âlî sâdır olup sadaka ihsân buyrulan suyun mikdârı su nâzırı defterinden derkenâr olunmak üzere fermân buyruldukda su nâzırı olan Osman Ağa dahi yedimizde olan hâmiş-i arzuhâlde zikr olunduğu üzere mârru’z--zikr çeşmenin Havâss-ı Aliyye kazâsına tâbi‘ Müderris karyesi sınırında Turunçluk kemerinin sağ yanında tarîk-i âm üzerinde müceddeden hafr olunan on üç bacadan ve tahte’l-arz lağımdan cem‘ ve tahsîl olunan üç masura suyun nısfı Koruk Mahmud Mahallesi’nde müceddeden binâ olunan çeşmeye ve nısfı Ebûbekir Paşa Câmi‘-i şerîfi kurbünde ta‘mîr ve ihyâ buyurdukları çeşme-i mezkûrede cârî olmak üzere yedimizde olan hatt-ı hümâyûn ile mu‘anven defterde mastûrdur deyü derkenâr olundukda su nâzırı i‘lâmı mûcebince kıbel-i şer‘den istihkâmen hüccet tahrîr ve ahâlî-i mahallenin muhtârlarına hıfz için teslîm olunmak bâbında fermân buyrulmağın nazar olunup mûcebince hüccet-i şer‘iyye tahrîr olunmak matlûbumuzdur deyü ibrâz eyledikleri fermâna nazar olundukda mazmûnu takrîr-i meşrûhlarına muvâfık olmağın imtisâlen-leh hıfzan li’l-makāl kıbel-i şer‘den işbu vesîka-i enîka ketb ü terkīm olunup yedlerine def‘ ve i‘tâ olundu. Fî-gurreti Cumâdelûlâ sene 1121 Şuhûdü’l-hâl: Mehmed Çelebi b. Abdi Kethüdâ-yı muhzırân, Galatalı Mustafa Çelebi b. Şa‘ban, Ali Çelebi b. İvaz Muhzır, Hasan b. Mustafa Muhzır, Ali b. Bâli ve gayruhum mine’l-huzzâr.