|
Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 116 Hüküm no: 147 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Lazari b. Yorgi ve Kosta b. Küçücük Yorgi’nin, ölen Mihal’in mukataa hissesini Kosta b. Manol’a vermesi
Vech-i tezkire oldur ki Kosta b. Manol Kara Doğan an karye-i Çengel meclis-i şer‘a sâbıkan müteveffâ karındaşı Mihal ile Kartal nâm vakıf karye mahsûlünü ber-vech-i iştirâk mutasarrıf olan Lazari b. Yorgi’yi Kosta b. Küçücük Yorgi’yi asâleten an nefsihî ve vekâleten an kıbeli ebîhi el-med‘uv Küçücük el-mezkûr gıbbe’s-sübûti vekâletihî şer‘an ihzâr edip üzerlerine şöyle takrîr-i kelimât edip karındaşım Mihal fevt olup muhallefâtı ciheti irsle bana ve kız karındaşıma ve zevcesine intikāl etti. Şimdi sen beni ne meyve ağaçlarına ve ne yerine dahl ettirirsin dedikde mezkûrân Lazari ve Kosta cevâb verip vâkı‘â karındaşın Mihal fevt olup muhallefâtı şer‘ ile size intikāl etti ama ebnâsından kimesnesi kalmayıp elinde mutasarrıf olduğu hissesi bir dâne mahlûl olup kānûn üzere bize ait olduğu üzerinde olan dikme ve aşılama ve aktarma(?) meyve ağaçlarından nizâ‘ımız yokdur. Lâkin yeri hâliyâ dahi kimesne tapuya vermeyip(?) el-ân bizim elimizdedir. Üzerinde olan hüdâyî ağaçlarıyla bile mutasarrıfsız dediklerinde mezkûr Kosta mezkûrların cemî‘i kelimâtlarında tasdîk edip hüdâyî ağaçlarında gayrisinden hisselerin taleb ettikde arz-ı mezkûre-i mahlûle üzerinde olan dikme ve aşılama aktarma(?) meyve ağaçlarının nısf hissesi şer ile mezkûr Kosta’ya ve kız kardaşına ve zevcesine hükm olup ve zirâ‘ate kābil olan yerleri hüdâyî ağaçlarıyla mezkûrûn Mihal ve Kosta b. Küçük üzerlerinde mukarrer kılınıp kazıyye sebt-i defter olundu. Fî evâili Cemâziyelâhir sene 925.
Şuhûdü’l-hâl: Manol b. Karakul, Yorgi b. Manol el-mezkûr, Yorgi b. Demirci, Dimoz b. Öksüz, Yani b. Kara Mihal ve gayruhum mine’l-hâzırîn
|