|
Üsküdar Mahkemesi 2 Numaralı Sicil (H. 924-927 / M. 1518-1521) cilt: 2, sayfa: 119 Hüküm no: 153 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yani b. Mihal’in ortağı Levend Nikola b. İlya’yı şikayet etmesi
Vech-i tezkire oldur ki İstanbullu Yani b. Mihal meclis-i şer‘a Levend Nikola b. İlya nâm zimmîyi ihzâr edip bundan akdem karındaşınla senin yüz altmış altı koyununuz var idi. Sonra İshak’la kethüdâdan yüz yetmiş beş koyun dahi aldık. Zikr olan yüz yetmiş beş koyunu ber vech-i iştirâk deynle alıp zikr olan yüz altmış altı koyun için dahi hesâblaşıp benim hakkım için sende iki bin altı yüz yetmiş akçe verip cümle koyunda müşterek olduk. Şimdi bana hakkım vermezsiz dedikde mezkûr Nikola cevâbında vâkı‘â ol yüz yetmiş beş koyunu iştirâk üzere deyn edip İshak’la kethüdâdan bile aldık. Sonra mezkûrân İshak’a koyun-ı mezkûr bahâsından koyun hâsılından altı bin altı yüz akçe verdik. Bâkī altı yüz yetmiş akçe kaldı ama sâbıkan biz kendi kendimizin olan yüz altmış altı koyun için senden iki bin altı yüz yetmiş akçe alıp cümle koyunda müşterek olmadık deyu inkâr ettikde mezkûr Yani’den suâl olundukda Mustafa ve Dranoz ve Nikola ve Yani nâm kimesneler şâhidlerimdir bundan gayri şâhidim yokdur dedikde üç gün mühlet verilip sebt-i defter olundu. Cemâziyelâhir yevm-i yekşenbih sene 925.
Şuhûdü’l-hâl: Seydi b. İlyas, Seferşah b. Süleyman, Şahım b. Durdu, Meşid Nikola b. Yorgi ve gayruhum
|