Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 208 Hüküm no: 188 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zakarya v. Abraham’ın arsası Peynirci Hacı Mehmed b. Pîrî Vakfı’na ait evini Hamamcızâde Hacı Ahmed Ağa b. Mehmed’e sattığı Mahmiye-i İstanbul’da Sulu Manastır Mahallesi’nde sâkin Zakarya v. Abraham nâm zimmî mahfil-i kazâda işbu hâfızü’l-kitâb Hamamcızâde el-Hâc Ahmed Ağa b. Mehmed tarafından husûs-ı âti’z-zikri tasdîka vekîl olduğu Halil Çelebi b. İbrahim ve Mustafa Beşe b. Halil şehâdetleriyle şer‘an sâbit olan Hallâc İbrahim Beşe b. Mehmed mahzarında ikrâr ve takrîr-i kelâm edip mahmiye-i mezbûrede Eğrikapı dâhilinde Molla Aşkī Mahallesi’nde vâki‘ arsasının merhûm Peynirci el-Hâc Mehmed b. Pîrî Vakfı’na yevmî bir akçe icâre-i müeccelesi olup akd-i âti’z-zikrin sudûruna değin ebniyesi yedimde mülk ve hakkım olan bir tarafdan İsak v. Santo nâm Yahûdi mülkü ve bir tarafdan Haim mülkü ve bir tarafdan Yahûdiler simârına? giden tarîk-i hâs ve bir tarafdan tarîk-i âm ile mahdûd ulyâda beş bâb oda ve iki matbah ve dehlîz ve vustâda beş bâb oda ve iki matbah ve dehlîz ve süflâda beş bâb oda ve iki matbah ve dehlîz ve zîr-i zemîn mahzen ve bi’r-i mâ ve kenîfleri müştemil Yahûdi hânenin ebniye-i memlûkesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkil-i merkūm el-Hâc Ahmed Ağa’ya bin iki yüz on guruşa bey‘ ve teslîm ve temlîk ve arsasını dahi bâ-izn-i mütevellî doksan guruş bedel mukābelesinde ferağ ve tefvîz ol dahi ber-vech-i muharrer iştirâ ve tesellüm ve temellük ve tefevvüz ve kabz ve kabûl ettiğinden sonra semeni olan meblağ-ı mezbûr bin iki yüz on guruş ile bedel-i merkūm doksan guruş ki cem‘an bin üç yüz guruşu müvekkil-i merkūm el-Hâc Ahmed Ağa bana def‘ ü teslîm ben dahi yedinden tamamen ahz u kabz eyledim fîmâ-ba‘d zikr olunan Yahûdi hânenin ebniyesi müvekkil-i mezbûr el-Hâc Ahmed Ağa’nın mülk-i müşterâsı olup ve arsası dahi dâhil-i havza-i tasarrufu olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Cumâdelûlâ sene 1121 Şuhûdü’l-hâl: Mehmed Efendi b. Musa el-İmâm, Mehmed Efendi b. Mehmed el-Müezzin, Kazzâz Ahmed Çelebi b. İsmail, Hallâc Mustafa C[emâ‘at] 73, Hallâc Salih Beşe C[emâ‘at] 73, Sakızlı Hüseyin Odabaşı C[emâ‘at] 86, Halil Beşe [Bölü]k 47, Kara Süleyman İstefalî, Ömer b. Ahmed, Mustafa Çelebi b. Şa‘ban, Ali Çelebi b. İvaz ve gayruhum mine’l-huzzâr.