Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 209 Hüküm no: 189 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Sâliha Hatun bt. Seyyid Mehmed’in vasisi olduğu mecnun Fâtıma bt. Hasan’a nafaka tayini Mahmiye-i İstanbul’da Mimâr Ayas Mahallesi’nde sâkine işbu râfi‘atü’l-vesîka Şerife Sâliha bt. es-Seyyid Mehmed nâm hatun mahfil-i kazâda takrîr-i kelâm ve tâʻbir ani’l-merâm edip mahmiye-i mezbûrede el-Hâc Muhyiddin Mahallesi’nde sâkine işbu hâzıratü bi’l-meclis mecnûne Fâtıma bt. Hasan’ın tesviye-i umûruna kıbel-i şer‘den ben vasî nasb olunmağla mecnûne-i mezkûrenin nafaka ve kisve ve sâir levâzım-ı zarûriyyesîçün mâlından kadr-i kifâye nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi mecnûne-i mezkûrenin nafaka ve kisve ve sâir levâzım-ı zarûriyyesîçün mâlından küllü yevm altışar akçe farz ve takdîr edip meblağ-ı mefrûz-ı mezbûru mecnûne-i mezkûrenin nafaka ve kisve ve sâir levâzımına sarfa ve lede’l-iktizâ istidâneye ve vakt-i zaferde mâlına rücû‘a vasiyy-i mezbûre Şerife Sâliha’ya izin vermeğin mâ-vaka‘a bi’t-taleb ketb olundu. Fî-gurreti Cumâdelûlâ sene 1121 Şuhûdü’l-hâl: el-Hâc Mustafa Efendi tâbi‘-i efendi, Mehmed Efendi b. ( ), el-Hâc Mehmed b. ( ), Mustafa b. Ali ve gayruhum mine’l-huzzâr.