Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 209 Hüküm no: 190 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. Hacı Mehmed’in Seydîbey Mahallesi’ndeki bir evdeki hissesini Mehmed Çelebi b. Mehmed’e sattığı Mahmiye-i İstanbul’da Defterdâr Ahmed Çelebi Mahallesi’nde sâkin el-Hâc Ahmed b. el-Hâc Mehmed nâm kimesne mahfil-i kazâda damadı işbu râfi‘u’l-kitâb Mehmed Çelebi b. Mehmed nâm kimesne mahzarında ikrâr ve takrîr-i kelâm edip mahmiye-i mezbûrede Seydî Bey Mahallesi’nde vâki‘ bir tarafdan benim âhar mülküm ve bir tarafdan müşteri-i mezbûr mülkü ve bir tarafdan Çorbacızâde mülkü ve bir tarafdan tarîk-i âm ile mahdûd fevkānî iki bâb oda ve tahtânî iki bâb oda ve bir kenîf ve bir su kuyusu ve bir mikdâr bahçeyi müştemil mülk menzilin dört sehm i‘tibârıyla bir sehmi benim ve bir sehmi müşteri-i mezbûr Mehmed Çelebi’nin ve iki sehmi gāibetü ani’l-meclis Rukiye bt. Abdullah nâm hatunun olmağla ber-vech-i muharrer menzil-i mahdûd-ı mezkûrda olan bir sehm hisse-i şâyi‘amı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mehmed Çelebi’ye elli beş guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ettiğinden sonra semeni olan meblağ-ı mezbûr elli beş guruşu mezbûr Mehmed Çelebi yedinden tamamen ahz u kabz eyledim baʻde’l-yevm menzil-i mahdûd-ı mezkûrda olan ber-vech-i muharrer bir sehm hisse-i şâyi‘am mezbûr Mehmed Çelebi’nin mülk-i müşterâsı ve hakk-ı mahzı olup kat‘â benim alâkam kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Cumâdelûlâ sene 1121 Şuhûdü’l-hâl: Eş-Şeyh Halil Efendi el-İmâm, İbrahim Efendi [b.] İmâm Seydî Bey, el-Hâc Hüseyin b. el-Hâc Mehmed, Mustafa Beşe b. Yusuf, Mehmed Çelebi b. Osman, Memiş Çelebi b. Abdi, İsmail Çelebi b. İbrahim, Ali Çelebi b. Mehmed, Ali Odabaşı b. Abdullah, Ali Çelebi b. Abdullah ve gayruhum mine’l-huzzâr.