Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 210 Hüküm no: 191 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Yanaki v. Panayot’un çocukları Nikola, Yamandi, Kostantin, Eline ve Ezmarağda’nın babalarından intikal eden evdeki hisselerini anneleri Aksandıra bt. Katalo’ya sattıkları Mahmiye-i İstanbul’da Seferikoz Mahallesi sükkânından olup bundan akdem hâlik olan Yanaki v. Panayot nâm zimmînin verâseti zevcesi Aksandıra bt. Katalo ile kebîr oğulları Nikolaki ve Yamandi ve Kostantin ve kebîre kızları Eline ve Ezmarağda’ya münhasıra ve tashîh-i mes’eleleri altmış dört sehmden olup sihâm-ı mezkûreden sekiz sehmi mezkûre Aksandıra’ya ve on dörder sehmi mezkûrûn Nikolaki ve Yamandi ve Kostantin’den her birine ve yedişer sehmi merkūmetân Eline ve Ezmarağda’dan her birine isâbet ve intikāl eylediği şer‘an zâhir ve mütebeyyin oldukdan sonra mezkûr Kostantin kendi asâleten ve karındaşı mezkûre Ezmarağda tarafından vekîl olduğu zât-ı mezkûreyi ma‘rifet-i şer‘iyye ile ârifân Mehmed Çelebi b. Abdürrezzak ve Ali Beşe b. Ahmed şehâdetleriyle şer‘an sâbit olmağla vekâleten ve mezkûr Nikola kezâlik kendi asâleten ve karındaşı mezkûre Eline tarafından vekîl olduğu zât-ı mezkûreyi ma‘rifet-i şer‘iyye ile ârifân şâhidân-ı mezkûrân şehâdetleriyle sâbit olmağla vekâleten ve mezkûr Yamandi dahi asâleten meclis-i şer‘-i şerîf-i enverde işbu râfi‘atü’l-vesîka vâlideleri mezkûre Aksandıra muvâcehesinde her biri bi’l-asâle ve bi’l-vekâle ikrâr ve takrîr-i kelâm edip arsasının Ayasofya-i Kebîr Vakfı’na senede iki yüz akçe mukāta‘ası olup ebniyesi ile’l-helâk mûrisimiz mezkûrun silk-i mülk-i sahîhinde münselik olmağın ba‘de helâkihî tashîh-i mezkûr üzere bize isâbet ve intikāl eden mahalle-i mezkûrede vâki‘ bir tarafdan fahrü’l-akrân Hadice Sultanzâde Ali Bey mülkü ve bir tarafdan Mihal nâm zimmî mülkü ve bir tarafdan sâhil-i bahr ve bir tarafdan tarîk-i âm ile mahdûd tabaka-i ulyâsında dört bâb oda ve dehlîz ve tabaka-i vustâsında bir bâb oda ve hamam ve tabaka-i süflâsında iki bâb oda ve bir matbah ve mahzen ve cüneyne ve hekîm dükkânı ve üzerinde bir odayı müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile vâlidemiz mezkûreye bin altı yüz guruşa bey‘ ve temlîk ve teslîm ol dahi ber-vech-i meşrûh iştirâ ve temellük ve kabûl ettiğinden sonra semeni olan meblağ-ı mezkûr bin altı yüz guruşu vâlidemiz mezkûre yedinden tamamen ahz u kabz ve alâ-kadri’l-hısas beynimizde iktisâm eyledik baʻde’l-yevm menzil-i mahdûd-ı mezkûr cümle müştemilâtıyla vâlidemiz mezkûrenin irsen ve şirâen mülk ve hakkı olup bizim kat‘â alâka ve medhalimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 8 min-Cumâdelûlâ sene 1121 Şuhûdü’l-hâl: Receb Çelebi b. İvaz, Ali Çelebi b. İvaz, Hasan Çelebi b. Mustafa, Abdurrahman Çelebi b. Mehmed, Hüseyin b. Abdullah, Mehmed Çelebi b. Abdürrezzak, Ali Beşe b. Ahmed, Osman Çelebi b. Hasan ve gayruhum mine’l-huzzâr. Hüseyin Çelebi b. Hasan, Abdullah Çelebi b. Abdurrahman, Papa İsteryo v. Papa Kovaki, Papa Yanaki v. İsteryo, Paya Dimitri v. Anastas, Yani v. Panayot, Kostantin v. Ligori, Dimitri v. Kiryako.