Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 211 Hüküm no: 192 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eline bt. Yanaki’nin vasisi olan annesi Aksandıra’dan kendisine ait her türlü eşya ile veraset hissesini teslim aldığı Kezâlik isâbet ve intikāl eylediği zâhir ve mütebeyyin oldukdan sonra mezkûre Eline tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân Mehmed Çelebi b. Abdürrezzak ve Ali Beşe b. Ahmed şehâdetleriyle şer‘an sâbit olan Nikolaki meclis-i şer‘-i şerîf-i lâzımü’t-teşrîfde işbu râfi‘atü’s-sifr vâlideleri mezkûre Aksandıra muvâcehesinde bi’l-vekâle ikrâr ve takrîr-i kelâm edip vâlidem mezkûre Aksandıra karındaşım müvekkile-i mezkûre <> Eline’nin hâl-i sıgārında vasiyyesi olmağla babası hâlik-i mezbûrdan intikāl eden nukūd ve huliy ve cevâhir ve mefrûşât ve melbûsât ve evânî-i nuhâsiye ve gayr-ı nuhâsiye ve akār ve menkūl ve icârât ve bi’l-cümle ism-i mâl ıtlâk olunur hisse-i irsiyyesini bi’l-vesâye ahz u kabz etmişidi el-hâletü hâzihî müvekkilem mezkûre Eline bâliğa ve reşide olmağla vâlidesi mezkûre eşyâ-i muharrere-i merkūmeyi müvekkilem mezkûreye bi’t-tamam ve’l-kemâl teslîm ol dahi yedinden ber-vech-i muharrer ahz u kabz ve tesellüm eyledi baʻde’l-yevm müvekkilem mezkûre Eline’nin vâlidesi merkūme ile babası hâlik-i mezkûrun kalîl ve kesîr ve celîl ve hakīr ve akār ve menkūl ve sâir ism-i mâl ıtlâk olunur terekesine müte‘allika âmme-i de‘âvî ve kâffe-i mutâlebâtdan zimmetini ibrâ-i âmm-ı râfi‘u’l-hısâm ile ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 8 min-Cumâdelûlâ sene 1121 Şuhûdü’l-hâl: Es-sâbikūn, es-sâbikūn, es-sâbikūn.