Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 212 Hüküm no: 193 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başka diyara giden Manol v. Papa Yani’nin hanımı Kali bt. Mihal’e nafaka tayini Mahmiye-i İstanbul’da Gül Câmi‘-i şerîfi Mahallesi’nde sâkine olup zâtı ta‘rîf-i şer‘î ile mu‘arrefe olan işbu bâ‘isetü’s-sifr Kali bt. Mihal nâm Nasrâniye meclis-i şer‘-i şerîf-i enverde takrîr-i kelâm edip zevcim Manol v. Papa Yani nâm zimmî bilâ-nafaka beni bırakıp diyâr-ı âhara gitmekle nafaka ve kisveye zarûret ve ihtiyâcım olmağın zevcim gāib-i mezbûr üzerine kadr-i ma‘rûf kıbel-i şer‘den nafaka ve kisve-bahâ farz ve takdîr olunmak matlûbumdur dedikde ba‘de’t-tahlîfü’ş-şer‘î hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri mezbûre Kali’nin nafaka ve kisve-bahâsıʼçün zevci gāib-i mezbûr üzerine beher yevm onar akçe farz ve takdîr edip meblağ-ı mefrûz-ı mezkûru nafaka ve kisve ve sâir mesârif-i lâzımesine harc u sarfa ve hîn-i zarûretde istidâneye ve lede’z-zafer zevci gāib-i mezbûr Manol üzerine rücû‘a mezbûre Kali’ye izin vermeğin mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Hasan b. Abdullah, Ahmed b. Abdurrahman, Takavî Mehmed Çelebi b. Abdullah, Abdullah b. Abdullah ve gayruhum mine’l-huzzâr.