Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 212 Hüküm no: 194 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabakulak Mustafa Ağa Vakfı’na borcu olan Ümmühani bt. Hüseyin’in borcunu ödemesi Mahmiye-i İstanbul’da vâki‘ merhûm Kabakulak Mustafa Ağa Vakfı’na mütevellî olan işbu bâ‘isü’l-kitâb Ali Efendi b. Mustafa meclis-i şer‘-i hatîrde zâtı Mehmed Çelebi b. Abdullah ve Molla Yusuf b. Mustafa ta‘rîfleriyle mu‘arrefe olan Ümmühani bt. Hüseyin nâm hatun mahzarında üzerine da‘vâ ve takrîr-i kelâm edip mezbûre Ümmühani’ye asl-ı mâl-ı vakf-ı mezbûrdan yüz kırk dokuz guruş idâne ve teslîm ol dahi istidâne ve kabz eyledikden sonra meblağ-ı mezbûr mukābelesinde bir çift altın bilezik ve bir çift zümrüd küpe ve incili bir çift ön kuşak rehin vaz‘ ve teslîm edip bundan akdem rihân-ı mezbûreyi yedimden ahz ve sûk-ı sultânîde baʻde’l-müzâyede seksen bir guruşa bey‘ ve semenini kabz ve deyn-i mezbûrun ol mikdârı mukābelesinde meblağ-ı mezbûr seksen bir guruşu bana teslîm ben dahi yedinden ahz u kabz edip meblağ-ı mezbûr yüz kırk dokuz guruşdan mezbûre Ümmühani zimmetinde altmış sekiz guruş bâkī kalmağın suâl olunup meblağ-ı bâkī-i mezbûru edâya merkūme Ümmühani’ye tenbîh olunmak matlûbumdur dedikde gıbbe’s-suâl mezbûre Ümmühani cevâbında fi’l-vâki‘ kaziyye bi’l-cümle bâlâda tafsîl olunan vech üzere olup meblağ-ı bâkī-i mezbûr altmış sekiz guruş taraf-ı vakfa el-ân zimmetinde vâcibü’l-edâ deyni olduğunu bi-tav‘ihâ ikrâr u i‘tirâf etmeğin alâ-mûcebi i‘tirâfihâ meblağ-ı bâkī-i mezbûru taraf-ı vakfa edâya mezbûre Ümmühani’ye tenbîh-birle mâ-vaka‘a bi’t-taleb ketb olundu. Fî 12 min-şehri Rebîʻülâhir sene 1121 Şuhûdü’l-hâl: İbrahim Efendi b. Ali, İbrahim Efendi b. Mustafa, Hasan Çelebi b. İvaz, Abdullah Efendi b. İvaz, Hammâmî Ahmed Ağa b. Mustafa, Mehmed Çelebi b. Veliyüddin, Mahmud b. Veli, Mehmed Çelebi b. Osman ve gayruhum mine’l-huzzâr.