Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 213 Hüküm no: 195 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Sefer’in Bor’da ebeveyninden intikal eden bağı ile menzil, leğen ve bir sığırdaki hissesini kardeşi Abdurrahman’a sattığı Vilâyet-i Anadolu’da Bor kasabası ahâlîsinden olup medîne-i Eyüb’de sâkin Mustafa b. Sefer nâm kimesne meclis-i şer‘-i şerîf-i enverde li-eb karındaşı işbu bâ‘isü’l-kitâb Abdurrahman nâm kimesne mahzarında ikrâr ve takrîr-i kelâm edip kasaba-i mezbûrede Cârullah Mahallesi’nde vâki‘ babamızdan müntakil bir tarafdan İbrahim Beşe oğlu menzili ve bir tarafdan Abdüsselam menzili ve bir tarafdan Ali Bey menzili ve bir tarafdan tarîk-i âm ile mahdûd menzili ve yine tereke-i mezbûreden bir leğen ve bir kara sığır ineğinde olan nısf hisse-i şâyi‘amı yirmi beş guruşa ve yine vâlidem olup bundan akdem fevt olan Raziye bt. Abdullah’dan müntakil olup kasaba-i mezbûrede vâki‘ Yusuf Beşe fidanı demekle ma‘rûf dokuz hark tâʻbir olunur ma‘lûmü’l-hudûd bağımı dahi yirmi beş guruş ki min-haysü’l-mecmû‘ elli guruşa mezbûr Abdurrahman’a bi-safkatin vâhidetin tarafeynden îcâb ve kabûlü hâvî bey‘-i kat‘î ile bey‘ ve temlîk edip ol dahi ber-vech-i muharrer iştirâ ve temellük ve kabûl eylediğinden sonra semenleri olan meblağ-ı mezbûr elli guruşu mezbûr Abdurrahman yedinden tamamen ahz u kabz eyledim baʻde’l-yevm zikr olunan menzil ve leğen ve ineğin nısfı ve bağ-ı mezkûrun mecmû‘u mezbûr Abdurrahman’ın mülk-i müşterâsı ve hakk-ı sırfı olup mahallinde zabt u tasarrufa mezbûr Abdurrahman’ı taslît eyledim keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Mustafa Efendi b. Ömer, Mahmud b. Hüseyin, Mehmed b. Hüseyin, Mustafa b. Şa‘ban, Ali b. İvaz ve gayruhum mine’l-huzzâr.