Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 213 Hüküm no: 196 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’in kocası Ali Çelebi b. Hasan’daki mehir bedelinin büyük bir kısmını alıp iki yüz akçe alacağının kaldığını tescil ettirdiği Mahmiye-i İstanbul’da Seferikoz Mahallesi sâkinelerinden olup zâtı ma‘rifet-i şer‘iyye ile ârifân Hâfız Mehmed Efendi b. Mahmud ve Mustafa Çelebi b. Ramazan ta‘rîfleriyle mu‘arrefe olan Fâtıma bt. İbrahim nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Ali Çelebi b. Hasan nâm kimesne mahzarında ikrâr ve takrîr-i kelâm edip mezbûr Ali Çelebi hâlâ zevcim olup zimmetinde mütekarrer ve ma‘kūdün-aleyh olan sekiz bin altı yüz akçe mehr-i müeccelimin sekiz bin dört yüz akçesini zevcim merkūm Ali Çelebi bana def‘ ü teslîm ben dahi yedinden tamamen ahz u kabz edip fîmâ-ba‘d mehr-i müeccel-i mezkûrdan bâkī kalan iki yüz akçe mehr-i müeccelimden mâ‘adâ zevcim merkūm Ali Çelebi zimmetinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Mustafa b Ramazan, el-Hâc Ahmed b. Abdullah, el-Hâc Mustafa b. Ahmed, Hasan Efendi b. Ali, Abdullah b. Abdullah, Ahmed Efendi b. Abdullah, Mustafa Çelebi b. Şa‘ban, Ali b. İvaz, Ali Çelebi b. Bâli.