Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 219 Hüküm no: 206 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed Ağa b. Hacı Ali ve hanımı Hadice bt. Abdullah’ın oturdukları menzilin altındaki Fazlı Efendi Vakfı’na ait arsanın biriken bir yıllık mukataa bedelini vakfa ödemeleri Husûs-ı âti’l-beyânın mahallinde ketb ü tahrîri ve fasl u hasmı için sâdır olan fermân-ı şerîfe imtisâlen savb-ı şer‘-i enverden Mevlânâ es-Seyyid Mustafa Efendi b. Abdülkerim ta‘yîn ve irsâl olunup ol dahi hâssa mi‘mârlarından Dede Mehmed Halîfe b. İshak ile Mahmiye-i İstanbul’da Muhtesib Karagöz Mahallesi’nde vâki‘ bir tarafdan Kethüdâyeri Hüseyin Ağa menzili ve bir tarafdan Müezzinzâde Ahmed Çelebi menzili ve bir tarafdan menzil-i mahdûd-ı mezkûrun ber-vech-i iştirâk mutasarrıfları olan Derviş Mehmed Ağa b. el-Hâc Ali ve zevcesi Hadice bt. Abdullah’ın mülk bahçeleri ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde ashâb-ı hayrâtdan merhûm Fazlı Efendi nâm sâhibü’l-hayrın vakfı mütevellîsi olan işbu râfi‘u’l-kitâb Mehmed Çelebi b. Veliyüddin nâm kimesne meclis-i ma‘kūd-ı mezkûrda mezbûrân Derviş Mehmed Ağa ve zevcesi Hadice Hatun mahzarlarında üzerlerine bi’t-tevliye da‘vâ ve takrîr-i kelâm edip mi‘mâr-ı mezbûr mesâhası üzere menzil-i mezkûrun ebniyesi tahtında olan tûlen ve arzen bi-hesâb-ı terbî‘î iki yüz kırk dört zirâ‘ arsa vakf-ı mezbûrdan olup yevmî birer akçe mukāta‘a-i kadîme ile mezbûrân Derviş Mehmed Ağa ve zevcesi Hadice tasarruflarında olmağla târih-i kitâb senesi gurre-i Cumâdelûlâ’sı ibtidâsına gelince bir senede zimmetlerinde üç yüz altmış akçe müctemi‘ olmağın bi’t-tevliye taleb eylediğimde bana edâdan imtinâ‘ ederler suâl olunup vakıf için edâya mezbûrâna tenbîh olunmak matlûbumdur dedikde gıbbe’s-suâl mezbûrân Derviş Mehmed Ağa ve zevcesi Hadice Hatun hâl bâlâda tafsîl olunduğu üzere olup arsa-yı mahdûde-i mezbûre mukāta‘asından târih-i merkūma gelince bir senede zimmetlerinde vakıf için üç yüz altmış akçe müctemi‘ olduğunu her biri ikrâr u i‘tirâf etmeğin alâ-mûcibi i‘tirâfihimâ meblağ-ı mezbûru ve baʻde’l-yevm müctemi‘ olan mukāta‘ayı dahi vakıf için mütevellî-i mezbûra edâ ve teslîme mezbûrân Derviş Mehmed Ağa ve zevcesi Hadice Hatun’a tenbîh eylediğini mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr el-Hâc Mehmed b. Ahmed ve Muhzır Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Fî 11 min-Cumâdelûlâ sene 1121 Şuhûdü’l-hâl: Fahrü’l-eimme Murad Efendi b. Hüseyin Ağa, Osman Ağa b. Ali, Hüseyin Çelebi b. Musa, Mehmed Efendi b. Hüseyin, Ali Çelebi b. Mehmed, Abdullah Efendi b. el-Hâc Mehmed, Mustafa b. Mehmed, İbrahim Çelebi b. Veli, Abdullah Çelebi b. Receb, Ali Çelebi b. Ahmed, es-Seyyid Mustafa Efendi b. Ömer, Ya‘kub Beşe b. Mehmed, Mehmed Beşe b. Hasan ve gayruhum mine’l-huzzâr.