Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 220 Hüküm no: 207 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Murtaza b. Ömer’in vefât eden kocası Dergâh-ı âlî yeniçerilerinden Mostarlı Mehmed Beşe b. Salih’deki mehir bedelini terekesinden sulh yoluyla aldığı Dergâh-ı âlî yeniçerilerinin kırk beşinci cemâ‘atine mahsûs olan oda neferâtından olup bundan akdem fevt olan Mostarlı Mehmed Beşe b. Salih b. Abdullah nâm kimesnenin verâseti zevce-i metrûke-i gayr-ı medhûlün-bihâsı Fâtıma bt. Murtaza b. Ömer nâm hatun ile li-ebeveyn er karındaşı Mustafa nâm kimesneye münhasıra olduğu şer‘an zâhir ve mütehakkık oldukdan sonra mezbûre Fâtıma Hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân es-Seyyid Ali Çelebi b. es-Seyyid Receb ve İbrahim Beşe b. Musa şehâdetleriyle şer‘an sâbit olan mezbûr Murtaza meclis-i şer‘-i şerîf-i enverde müteveffâ-i mezbûrun bi’l-verâse terekesine vâzı‘u’l-yed olan işbu râfi‘u’l-kitâb mezbûr Mustafa mahzarında bi’l-vekâle ikrâr ve takrîr-i kelâm edip müvekkilem ve kızım mezbûre Fâtıma Hatun müteveffâ-i mezbûrun zevci olup zimmetinde mütekarrer ve ma‘kūdün-aleyh olan altı bin akçe mehr-i müeccelini müteveffâ-i mezbûrun terekesine vâzı‘u’l-yed olan merkūm Mustafa’dan bundan akdem bi’l-vekâle taleb ve da‘vâ eylediğimde beynimizde nizâ‘ vukū‘undan sonra muslihûn tavassut edip da‘vâ-yı mezkûremden merkūm Mustafa’yı benimle iki bin yedi yüz akçe üzerine bi’l-vekâle sulh eylediklerinde ben dahi ber-vech-i muharrer sulh-ı mezbûru baʻde’l-kabûl bedel-i sulh olan meblağ-ı mezbûr iki bin yedi yüz akçeyi müvekkilem mezbûre Fâtıma Hatun için bi’l-vekâle merkūm Mustafa yedinden tamamen ahz u kabz eyledim fîmâ-ba‘d mehr-i müeccel-i mezbûrdan bâkī üç bin [28a] üç yüz akçeye ve müteveffâ-i mezbûrun sâir terekesine müte‘allika olan âmme-i da‘vâdan mezbûr Mustafa’nın zimmetini ibrâ-i âmm-ı râfi‘u’l-hısâm ile bi’l-vekâle ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-Cumâdelûlâ sene 1121 Şuhûdü’l-hâl: Ömer Efendi b. Osman Mu‘allim-i mekteb, Ahmed b. Abdullah, Mehmed b. Abdullah, Mustafa Çelebi b. Şa‘ban ve gayruhum mine’l-huzzâr.