Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 221 Hüküm no: 208 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Mehmed’in hanımı Ayşe bt. Ali’de cariye bedelinden ve Ayşe’nin de Hacı Mehmed’deki çeşitli eşya bedelinden olan alacakları hususunda birbirlerinin zimmetlerini ibra ettikleri Mahrûse-i Galata’ya tâbi‘ kasaba-i Tophâne’de Perviz Ağa Mahallesi’nde sâkin el-Hâc Mehmed b. Mehmed nâm kimesne meclis-i şer‘-i şerîf-i enverde zevcesi olup zâtı ta‘rîf-i şer‘î ile mu‘arrefe olan işbu râfi‘atü’l-vesîka Âişe bt. Ali nâm hatun mahzarında ikrâr ve takrîr-i kelâm edip zevcem mezbûre Âişe zimmetinde beynimizde ma‘lûm bir re’s câriye semeninden üç yüz guruş hakkım olup meblağ-ı mezbûrun yüz yetmiş guruşunu emrim ile gāib ani’l-meclis Mustafa nâm kimesneye ma‘lûmü’l-mikdâr deynim için edâ ve teslîm ve bâkī yüz otuz guruşu dahi beynimizde ma‘lûm bana teslîm eylediği emti‘a-i mütenevviʻa semeninden istîfâ edip min-ba‘d meblağ-ı mezbûr üç yüz guruşdan zevcem mezbûre Âişe zimmetinde bir akçe ve bir habbe hakkım bâkī kalmayıp husûs-ı mezbûra müte‘allika âmme-i da‘vâdan mezbûre Âişe’nin zimmetini ibrâ ve iskāt edip ol dahi kezâlik benim zimmetimi ibrâ ve iskāt eyledi baʻde’l-yevm birbirimiz ile aslâ da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Abdullah, Hasan Çelebi b. Mustafa, Mehmed Çelebi b. Abdullah, Ali b. İvaz ve gayruhum mine’l-huzzâr.