Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 222 Hüküm no: 209 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Lefteri ile Osman b. Mehmed’in aralarındaki alacak davasından birbirlerinin zimmetlerini ibra ettikleri Vilâyet-i Rumeli’nde Mazarak kazâsına tâbi‘ Preşavitcs nâm karye sükkânından olup mahmiye-i İstanbul’da Fenerkapısı dâhilinde vâki‘ ekmekçi fırınında müsâferet vechi üzere sâkin habbâz tâifesinden Nikola v. Lefteri nâm zimmî meclis-i şer‘-i şerîf-i lâzımü’t-teşrîfde işbu bâ‘isü’l-kitâb Osman b. Mehmed nâm kimesne mahzarında ikrâr-ı tâm ve takrîr-i kelâm edip târih-i kitâbdan iki buçuk sene mukaddem mezbûr Osman beni bi-gayr-ı hak ahz u habsedip zulmen yetmiş beş guruşumu ahz u kabz etmişidi deyü meblağ-ı mezbûru merkūm Osman’dan taleb ve da‘vâ eylediğimde mezbûr Osman dahi senin karındaşın Martin zimmetinde benim elli beş guruş hakkım olup meblağ-ı mezbûra sen tarafeynden emir ve kabûlü hâviye kefâlet-i sahîha-i şer‘iyye ile kefîl olmuşidin deyü benden min-ciheti’l-kefâle meblağ-ı mezbûru taleb ve da‘vâ etmekle beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî minvâl-i muharrer üzere olan da‘vâmızdan her birimiz meccânen fâriğ olup husûs-ı mezbûra ve gayra müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Osman’ın zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ve mezbûr Osman dahi benim zimmetimi ibrâ ve iskāt eyledi dedikde gıbbe’t-tasdîkı’l-mu‘teber mezbûr Osman meclis-i mezkûrda takrîr-i kelâm edip bundan akdem husûs-ı mezbûr için da‘vet-i şer‘-i şerîf eylediğimde mezbûr Nikola itâ‘at-ı şer‘ etmedi deyü yedime hüccet verilmişidi baʻde’l-yevm zuhûr eder ise amel olunmasın dedikde mâ-vaka‘a bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Mustafa b. Şa‘ban, İsmail b. Ömer, Ömer Çelebi b. Mehmed, Seydî b. Ali, Süleyman b. Abdullah, Receb b. Hüseyin, Ali Çelebi b. İvaz, Mustafa b. Hasan, Mustafa b. Abdullah, Mehmed b. Abdullah, Ali b. Bâli ve gayruhum mine’l-huzzâr.