Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 222 Hüküm no: 210 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik ve Kaspar’ın vefât eden babalarınden intikal eden Yakob v. Yakob’un Arabkir’deki ev ve bağdaki hisselerini diğer kardeşleri Ağya’ya sattıkları Vilâyet-i Anadolu’da Arabkir kasabası ahâlîsinden olup bundan akdem hâlik olan Yakob v. Yakob nâm zimmînin sulbî oğulları Avadik ve Kaspar ve Ağya nâm zimmîlere münhasıra olduğu şer‘an zâhir ve mütehakkık oldukdan sonra hâlâ vilâyet-i Rumeli’nde İsmail kasabasında sâkin mezbûrân Avadik ve Kaspar taraflarından husûs-ı âti’l-beyânı ikrâra vekîl olduğu Bayram b. Abdullah ve İbrahim b. Mehmed nâm kimesneler şehâdetleriyle sâbit olan Asvader v. Serkiz nâm zimmî mahfil-i kazâda mezbûrânın li-ebeveyn karındaşları olan işbu râfi‘u’s-sifr mezbûr Ağya muvâcehesinde bi’l-vekâle ikrâr ve takrîr-i kelâm edip hâlik-i mezbûrun ile’l-helâk yedinde mülkü olup ba‘de helâkihî mezbûrûna intikāl eden mârru’z--zikr Arabkir kasabasında Üçhark Mahallesi’nde vâki‘ bir tarafdan Kamıklıoğlu menzili ve bir tarafdan Molla Abdullah menzili ve bir tarafdan cebel ve bir tarafdan tarîk-i âm ile mahdûd dört bâb oda ve bir mikdâr havluyu müştemil mülk menzil ile yine kasaba-i mezbûre hâricinde Küçükmeydan demekle ma‘rûf mahallinde vâki‘ lede’l-ahâlî ve’l-cîrân ma‘lûmü’l-hudûd mülk bağda olan iki sehm hisse-i şer‘iyyelerini müvekkillerim mezbûrân Avadik ve Kaspar tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Ağya’ya bi-safkatin vâhidetin yüz elli guruşa bey‘ ve temlîk eylediklerinde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz elli guruşu bi-kadri’l-hısas her biri karındaşları mezbûr yedinden tamamen ahz u kabz edip mahallinde zabt u tasarrufa mezbûr Ağya’yı taslît eylediler min-ba‘d zikr olunan menzil ve bağ merkūm Ağya’nın irsen ve şirâen mülkü olup müvekkillerim mezbûrânın alâka ve medhalleri kalmadı keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Cumâdelûlâ sene 1121 Şuhûdü’l-hâl: Mehmed Çelebi Kethüdâ-yı muhzırân, Mustafa Çelebi b. Şa‘ban Tahtacı, Ömer Çelebi b. Ahmed el-Muhzır, Ali Çelebi b. İvaz, Ali Çelebi b. Bâli ve gayruhum mine’l-huzzâr.