Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 223 Hüküm no: 211 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Kolcu Hacı Murad b. Yusuf’un Hacı Yahya b. Ahmed ile vefât eden kardeşi Hacı Mehmed’de olan alacaklarını Hacı Murad’ın vârisleri Hacı Yahya’dan ve Hacı Mehmed’in vârislerinden sulh yoluyla aldıkları Mahmiye-i İstanbul’da Harâccı Kara Mehmed Mahallesi’nde sâkin iken bundan akdem vefât eden Kolcu el-Hâc Murad b. Yusuf’un verâseti zevce-i metrûkesi Sâliha bt. Abdullah ile sulbî kebîr oğlu İsmail’e ve kebîre kızı Emine’ye münhasıra olup ba‘dehû mezbûre Emine dahi vefât edip verâseti vâlidesi mezbûre Sâliha ile oğlu Ali’ye münhasıra olduğu mütehakkık oldukdan sonra kendi tarafından asıl ve vâlidesi mezbûre Sâliha tarafından husûs-ı âti’l-beyâna vekîl olduğu Hasan b. Receb ve el-Hâc Hasan b. Mehmed şehâdetleriyle sâbit olan mezbûr İsmail mahfil-i kazâda ashâb-ı hâze’l-kitâb el-Hâc Yahya b. Ahmed ile mezbûr el-Hâc Yahya’nın karındaşı olup bundan akdem vefât eden el-Hâc Mehmed’in verâseti zevcesi Râbia bt. Abdullah ve kebîr oğlu mezbûr Ali’ye ve kebîre kızı Emetullah’a münhasıra olmağla mezbûre Emetullah’ın zevci ve husûs-ı âti’l-beyâna vekîl olduğu mütehakkık olan Yazıcı Hasan b. Receb ile mezbûrân Ali ve Râbia mahzarlarında bi’l-asâle ve bi’l-vekâle ikrâr ve takrîr-i kelâm edip mezbûr el-Hâc Yahya ile karındaşı mezbûr el-Hâc Mehmed babam müteveffâ-i mezbûr ile hayâtlarında kolculuk san‘atında şerîkler olup ba‘de vefâtihi yedimde olan hüccet nâtıka olduğu üzere mezbûrân el-Hâc Yahya ve el-Hâc Mehmed ile beynimizde hesâb gördüğümüzde sermâye ve fâideden ba‘de külli hesâb mezbûrân el-Hâc Yahya ve el-Hâc Mehmed zimmetlerinde babam mezbûr el-Hâc Murad’ın üç bin guruş hakkı bâkī kaldığı hîn-i muhâsebede zâhir oldukdan sonra mezbûrân el-Hâc Yahya ve el-Hâc Mehmed meblağ-ı mezbûrun bin guruşunu mukaddemâ bana teslîm ben dahi asâleten ve vekâleten kabz edip iki bin guruş zimmetlerinde bâkī kalmağla hattâ meblağ-ı bâkī-i mezbûr zimmetlerinde deyni olduğunu mezbûrân el-Hâc Yahya ve el-Hâc Mehmed bundan akdem İstanbul kādısı olan merhûm Muslu Efendi huzûrunda ikrâr dahi etmeleriyle edâsına hüküm ve hüccet olunmağın hâlâ meblağ-ı bâkī-i mezbûr iki bin guruşu [28b] dahi asâleten ve vekâleten mezbûre Emetullah ve Ali ve Râbia’dan taleb ve da‘vâ ettiğimde onlar dahi cevâbında kaziyye minvâl-i meşrûh üzere olup lâkin mezbûr Muslu Efendi’nin nâibi Abdullah Efendi imzâsıyla mümzât yedimizde olan hüccet nâtıka olduğu üzere deyn-i mezbûrdan bâkī kalan meblağ-ı mezbûra müte‘allika da‘vâdan zimmetimizi bi’l-asâle ve bi’l-vekâle ibrâ etmişidin dediklerinde ben dahi mezbûrân el-Hâc Yahya ve el-Hâc Mehmed yedlerinde olan ibrâ hücceti târihinden on bir gün sonra meblağ-ı bâkī-i mezbûr iki bin guruş zimmetlerinde deyni olduğunu yedimde olan hüccet-i mezkûre nâtıka olduğu üzere ikrâr etmişler idi deyüp bu vech üzere beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden benimle mezbûrân el-Hâc Yahya ve Ali asâleten ve mezbûre Râbia dahi asâleten ve mezbûre Emetullah’ın zevci ve vekîli mezbûr Yazıcı Hasan dahi vekâleten üç yüz guruşa sulh olduklarında ben dahi bi’l-asâle ve bi’l-vekâle sulh-ı mezbûru kabûl ve bedel-i sulh olan meblağ-ı mezbûr üç yüz guruşu asâleten ve vekâleten ahz u kabz ettiğimden sonra husûs-ı mezkûra müte‘allika âmme-i de‘âvî ve mutâlebâtdan bi’l-asâle ve bi’l-vekâle mezbûrûn el-Hâc Yahya ve Ali ve Râbia ve Emetullah’ın zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî-evâsıtı Cumâdelûlâ sene 1121 Şuhûdü’l-hâl: el-Hâc Hasan b. Mustafa, el-Hâc Ahmed b. Ali, Ahmed Efendi b. ( ), el-Hâc Mustafa b. Kahraman, el-Hâc Ali, el-Hâc Hasan b. Mehmed, el-Hâc Mehmed b. Receb, Hasan b. Receb, el-Hâc Mehmed b. Mustafa, el-Hâc Mustafa b. Mehmed, Hasan Çelebi b. Receb, el-Hâc Hüseyin b. Mehmed ve gayruhum mine’l-huzzâr.