Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 225 Hüküm no: 212 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Bektaş b. Mustafa’nın kiracısı olduğu Kara Çelebizâde Hüsameddin Vakfı’na ait değirmenin tasarrufunu Mehmed Efendi b. Hacı Mustafa’ya devrettiği Mahmiye-i İstanbul’da Hoca Kasım Gönânî Mahallesi’nde sâkin el-Hâc Bektaş b. Mustafa nâm kimesne meclis-i şer‘-i hatîrde işbu bâ‘isü’l-kitâb Mehmed Efendi b. el-Hâc Mustafa nâm kimesne mahzarında merhûm Kara Çelebizâde Hüsameddin Vakfı’na bi’l-fi‘il mütevellî olan Mehmed Çelebi b. Veliyüddin hâzır olduğu hâlde ikrâr ve takrîr-i kelâm edip vakf-ı mezbûr musakkafâtından olup bi’l-icâreteyn taht-ı tasarrufumda olup mahmiye-i mezbûrede Odabaşı Çarşısı nâm mahalde vâki‘ ma‘lûmü’l-hudûd iki çarh horos değirmenini mezbûr Mehmed Efendi’ye mütevellî-i mezbûr Mehmed’in izin ve ma‘rifetiyle beş yüz yirmi guruş bedel mukābelesinde ferağ ve kasr-ı yed eylediğimde ol dahi kabûl ve bedel-i mezbûru bana teslîm edip ben dahi ahz u kabz eyledim baʻde’l-yevm zikr olunan değirmen merkūm Mehmed Efendi’nin hakk-ı müfevvazı olup benim kat‘â alâka ve medhalim kalmadı dedikde gıbbe’t-tasdîkı’l-vicâhî mâ-vaka‘a bi’t-taleb ketb olundu. Fî 15 min-şehri Rebîʻülâhir sene 1121 Şuhûdü’l-hâl: Hamza Efendi b. Mehmed, Mustafa Çelebi b. İbrahim, el-Hâc Mustafa b. el-Hâc Mehmed, Mustafa Çelebi b. Şa‘ban ve gayruhum mine’l-huzzâr.