Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 225 Hüküm no: 213 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Bektaş b. Mustafa’nın kiracısı olduğu Kara Çelebizâde Hüsameddin Vakfı’na ait arsanın üzerine yaptırdığı değirmenin inşasına harcadığı paranın vakıf tarafından kirasına mahsup edilmek şartıyla yıkılmasını kabul ettiği Mahmiye-i İstanbul’da Hoca Kasım Gönânî Mahallesi’nde sâkin el-Hâc Bektaş b. Mustafa nâm kimesne meclis-i şer‘-i hatîrde merhûm Kara Çelebizâde Hüsameddin Efendi Vakfı’na bi’l-fi‘il mütevellî olan işbu râfi‘u’l-kitâb Mehmed Çelebi b. Veliyüddin mahzarında ikrâr ve takrîr-i kelâm edip mahmiye-i mezbûrede Odabaşı Çarşısı demekle ma‘rûf mahalde vâki‘ iki çarh horos değirmeninin arsası vakf-ı mezbûrdan beher şehr yüz on beş akçe ücret-i müeccele ile tasarrufumda olduğu hâlde üç bâb harâba müşrif odayı müştemil olup ta‘mîr ve meremmete galle-i vakfda müsâ‘ade yokdur deyü mütevellî-i mezbûr Mehmed Çelebi’den mukaddem vakf-ı mezbûra mütevellî olan ( ) nâm kimesne mülkiyet üzere binâya bana izin verip ben dahi mâlım ile nefsim için zikr olunan değirmeni binâ ve ihdâs etmişidim hâlâ mütevellî-i mezbûr Mehmed Çelebi galle-i vakfda binâya müsâ‘ade olup mütevellî-i sâbık-ı mezbûrun ber-vech-i muharrer izni mu‘teber olmamağla ebniye-i mezbûreyi kal‘ ile vakıf için ke’l-evvel odalar binâ ederim deyü da‘vâ edip ve mütevellî-i mezbûrun takrîr-i meşrûhu üzere galle-i vakıfda binâya müsâ‘ade olup ebniye-i mezbûre müstehakku’l-kal‘ idiği müte‘ayyin olmağın hâlâ ben ebniye-i mezbûreyi mahallinde terk ve masrûfum icâre-i mu‘accelesine mahsûb-ı vakf olmak üzere tâlib ve râgıb olduğumda mütevellî-i merkūm dahi vakfa her vechile evlâ [ve] enfa‘ <> olmağla ma‘rifet-i şer‘le râzî olup ve ber-vech-i muharrer vakfiyetini nâtık temessük tahrîr ve taraf-ı vakfdan icâre-i kadîmesiyle bana îcâr edip ben dahi istîcâr ve kabûl eyledim min-ba‘d zikr olunan değirmenin mülkiyetine müte‘allika kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ sene 1121 Şuhûdü’l-hâl: Es-sâbikūn, es-sâbikūn, es-sâbikūn.