Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 226 Hüküm no: 214 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Bektaş b. Mustafa’nın kiracısı olduğu Kara Çelebizâde Hüsameddin Vakfı’na ait değirmenin etrafına mütevellinin emriyle yaptırdığı duvarlara harcadığı parayı mütevelliden teslim aldığı Mahmiye-i İstanbul’da Kasab İvaz Mahallesi’nde sâkin Mehmed Efendi b. el-Hâc Mustafa nâm kimesne meclis-i şer‘-i şerîf-i enverde merhûm Kara Çelebizâde Hüsameddin Vakfı’na bi’l-fi‘il mütevellî olan işbu bâ‘isü’l-vesîka Mehmed Çelebi b. Veliyüddin nâm kimesne mahzarında ikrâr ve takrîr-i kelâm edip vakf-ı mezbûr musakkafâtından olup mahmiye-i mezbûrede Odabaşı Çarşısı demekle ma‘rûf mahalde vâki‘ bi’l-icâreteyn taht-ı tasarrufumda olan iki çarh horos değirmeni vakf-ı mezbûr musakkafâtından sâir odalara muttasıl olup değirmen-i mezbûrun deverânından zikr olunan odalara vehn târî olmamak için etrâf duvarlarını metîn ve duvarı olmayan mahalle dahi duvar binâ etmek üzere mütevellî-i mezbûr bana emir etmeğin ben dahi galle-i vakfa bi-şartü’r-rücû‘ etrâf taş duvarları ta‘mîr ve tecdîd edip mecmû‘ kırk guruş masrûfum olmağın hâlâ mütevellî-i mezbûr Mehmed Çelebi meblağ-ı mezbûr kırk guruşu ma‘rifet-i şer‘le galle-i vakf-ı mezbûrdan bana teslîm ben dahi yedinden ahz u kabz eyledim dedikde gıbbe’t-tasdîkı’l-vicâhî mâ-hüve’l-vâki‘ bi’t-taleb ketb olundu. Fî 2 min-Cumâdelûlâ sene 1121 Şuhûdü’l-hâl: Ali Çelebi b. Ömer, Mustafa Çelebi b. Abdullah, el-Hâc Mustafa b. el-Hâc Mehmed, Mehmed Çelebi b. Abdi ve gayruhum mine’l-huzzâr.