Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 226 Hüküm no: 215 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Hüseyin’in Çukur Mahallesi’ndeki evini Haseki Halil b. Hacı Ahmed’e sattığı Mahmiye-i İstanbul’da Yenikapı dâhilinde Çukur Mahallesi’nde sâkin fahrü’l-akrân Ahmed Ağa b. Hüseyin nâm kimesne meclis-i şer‘-i şerîf-i enverde işbu râfi‘u’l-kitâb Halil Haseki b. el-Hâc Ahmed muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezkûrede vâki‘ bir tarafdan Ali Ağa mülkü ve bir tarafdan imâma meşrûta vakıf menzil ve bir tarafdan el-Hâc Halil mülkü ve bir tarafdan tarîk-i âm ile mahdûd hâriciyede fevkānî bir bâb şehnişînli oda ve bir bâb sagīr oda ve tahtında bir bâb ahır ve bir abdesthâne ve bir kenîf ve dâhiliyede tabaka-i ulyâda iki bâb oda ve bir bâb sagīr kiler odası ve bir sofa ve bir kenîf ve bir kaygan döşemeli dehlîz ve bir sofa ve tabaka-i vustâda bir bâb oda ve bir matbah odası ve bir mağsel ve bir tahta-pûş ve bir sofa ve dehlîz ve tabaka-i süflâda bir kenîf bir su kuyusu ve bir mikdâr havlu ve mezkûr Ali Ağa tarafında taş duvarı müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezkûr Halil Haseki’ye bin iki yüz otuz beş guruşa bey‘ ve temlîk ve teslîm ol dahi ber-vech-i meşrûh iştirâ ve temellük ve tesellüm ve kabûl eylediğinden sonra semeni olan meblağ-ı mezbûr bin iki yüz otuz beş guruşu mezkûr Halil Haseki yedinden tamamen ahz u kabz eyledim baʻde’l-yevm menzil-i mahdûd-ı mezkûr cümle müştemilâtıyla merkūm Halil Haseki’nin mülk-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Muslu Ağa Silahşor-ı şehriyârî, el-Hâc İbrahim Efendi b. Mehmed mukāta‘a-i sâbık, İmâm İbrahim Efendi b. Mehmed, es-Seyyid Abdurrahman Efendi b. es-Seyyid Abdullah, Ali Usta Bahçıvan, Pertevzâde Mehmed Ağa b. Ali, İsmail Çelebi b. Mehmed, Hüseyin b. Hasan, Mustafa Çelebi b. Şa‘ban ve gayruhum mine’l-huzzâr.