Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 227 Hüküm no: 216 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin Vakfı’na ait odalarının tamire muhtaç olan lağım giderinin Âmine ve Zahide Hanım Vakfı tarafından tamir edilmesi Mahmiye-i İstanbul’da Tercümân Yunus Mahallesi’nde vâki‘ merhûm el-Hâc Hüseyin nâm sâhibü’l-hayrın binâ eylediği mescid-i şerîfin bi’l-fi‘il mütevellîsi olan işbu râfi‘u’l-kitâb Mehmed Emin Efendi b. Mustafa ve vakf-ı mezbûr müstecirlerinden Nasrullah Beşe b. Ahmed ve Şa‘ban Çelebi b. Mustafa ve el-Hâc Mehmed b. Maden ve Molla Halil b. el-Hâc Mehmed nâm kimesneler ile Havvâ Hatun bt. Abdullah ve diğer Havvâ Hatun bt. Abdullah ve Râbia Hatun bt. Mustafa ve sâirleri meclis-i şer‘-i hatîrde merhûmetân Âmine ve Zahide nâm hatunlar vakfından yine mahalle-i mezbûrede vâki‘ odaların mütevellîsi kāimmakāmı olan Abdi Çelebi b. ( ) mahzarında her biri üzerine da‘vâ ve takrîr-i kelâm edip zikr olunan el-Hâc Hüseyin Vakfı’ndan odaların kârîzi kadîmü’l-eyyâmdan ilâ-hâze’l-yevm beher sene otuz akçe mukāta‘a ile mârru’z--zikr Âmine ve Zahide Hatun Vakfı olan odaların kadîm lağım-ı kebîrine mülhak ve cârî olup lâkin zikr olunan kârîzin üzerinde su lağımı olup kâriz lağmının önü sed olmağla suya zararı vardır ta‘mîr edin deyü su nâzırı ve Ayasofya mütevellîsi taraflarından tenbîh olunmağla ta‘mîr iktizâ etmeğin taraf-ı şer‘den keşf ve istihbâr olundukda zikr olunan kârîzin lağım-ı kebîri Âmine ve Zahide Hatun Vakfı’nın olup el-Hâc Hüseyin odalarının kârîzi kadîmü’l-eyyâmdan otuz akçe mukāta‘a ile mülhak ve cârî olduğu bî-garaz Müslimîn ihbârıyla sâbit ve müte‘ayyin olup ve mûcebince taraf-ı Devlet-i aliyye’ye i‘lâm olundukda fermân-ı âlî dahi sâdır olmağın hâlâ nazar olunup mütevellî-i mezbûra zikr olunan lağım-ı kebîri taraf-ı vakfdan ta‘mîr ve el-Hâc Hüseyin odalarının kârîzi mukāta‘a-i kadîmesiyle cereyân etmek üzere tenbîh olunmak murâdımızdır dediklerinde fi’l-vâki‘ yedlerinde olan derkenâr ve mûcebince fermân-ı âlîye nazar olundukda takrîr-i meşrûhlarına mutâbık olmağın zikr olunan lağım-ı kebîr Âmine ve Zahide Hatun Vakfı’ndan ta‘mîr olunup mârru’z--zikr el-Hâc Hüseyin odalarının kârîzi mukāta‘a-i kadîmesiyle ke’l-evvel cârî olmak üzere kāimmakām-ı mütevellî olan mezbûr Abdi Çelebi’ye tenbîh-birle mâ-vaka‘a bi’t-taleb ketb olundu. Fî 20 min-şehri Rebîʻülâhir sene 1121 Şuhûdü’l-hâl: Mehmed Çelebi b. Abdi, Hasan Çelebi b. Mustafa, Hasan Beşe b. Abdullah, Hüseyin Çelebi b. Hasan, Receb Çelebi b. Ahmed ve gayruhum mine’l-huzzâr.