Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 228 Hüküm no: 217 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Seyyid Mehmed b. İsa’nın geçinemediği kocası Mustafa b. Mehmed’den boşandığı Mahmiye-i İstanbul’da İskender Ağa Mahallesi’nde sâkine Hadice nâm sagīrenin babası ve velîsi es-Seyyid Mehmed b. İsa nâm kimesne mahfil-i kazâda sagīre-i mezbûrenin zevc-i dâhili işbu râfi‘u’l-kitâb Mustafa b. Mehmed mahzarında bi’l-velâyeti ikrâr ve takrîr-i kelâm edip kızım sagīre-i mezbûre ile zevci mezbûr Mustafa’nın beynlerinde hüsn-i zindegāneleri olmamağla zimmetinde mütekarrer ve ma‘kūdün-aleyh olan iki bin dört yüz akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve bedel-i hul‘ olmak üzere kendiye medfû‘um olan iki tuç sahan ve bir yemenî yorgan ve bir minder ve iki yasdık üzerlerine ve meûnet-i süknâsı dahi kendi üzerine olmak üzere bi’l-velâye muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezbûru kabûl eylediğinden sonra kızım işbu sagīre-i mezbûre baʻde’l-bülûğ zevci Mustafa’dan mehr-i mezkûrundan ve sâir hukūkundan bir nesne taleb ve da‘vâ ve bir şey ahz eder ise me’hûzuna ben kefîl ve dâmin oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Cumâdelûlâ sene 1121 Şuhûdü’l-hâl: Ömer Çelebi b. Ahmed, Ali Beşe b. İsmail, İbrahim Çelebi b. İsmail, Ahmed b. Mehmed, Mehmed b. Ramazan, Ali b. Ramazan, es-Seyyid Mustafa b. Ali, Mehmed Efendi b. Abdullah, Mustafa b. Şa‘ban, Ali b. İvaz ve gayruhum mine’l-huzzâr.