Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 229 Hüküm no: 218 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiracı olduğu fırını kapatıp firar eden Ermeni Melkon v. Bağdasar v. Minas’ın eşyalarını korumak üzere Molla Mehmed b. Hacı Ömer’in kayyum tayin edildiği Mahmiye-i İstanbul’da Küçükpazar sûkunda Somuncu fırınında müstecir olan Melkon v. Bağdasar v. Minas nâm Ermeni bundan akdem fırın-ı mezkûru mukaffel bırakıp firâr ve gaybet-i münkatı‘a ile gāib oldukdan sonra uncu tâifesinden işbu hâzır bi’l-meclis es-Seyyid Mustafa b. Ebûbekir nâm kimesne ben gāib-i mezbûr tarafından vekîl oldum deyü âhar Ermeniyi medîne-i Üsküdar mahkemesine getirip muvâza‘a ile vekâlet hücceti peydâ ve gāib-i mezbûrun eşyâsını fuzûlen zabt eylediğini mezbûr es-Seyyid Mustafa meclis-i şer‘de ikrâr etmekle gāib-i mezbûrun eşyâsını mezbûr es-Seyyid Mustafa yedinde zâyi‘ ve telef olacağını zeyl-i kitâbda muharrerü’l-esâmî bî-garaz Müslimîn ihbâr etmeleriyle gāib-i mezbûru eşyâsını mezbûr es-Seyyid Mustafa’dan ahz u kabz ve hıfza bir kayyûm nasbı lâzım ve mühim olmağın diyânet ile ma‘rûf ve istikāmet ile meşhûr kayyûmluk uhdesinden gelmeğe kādir idiği lede’ş-şer‘ zâhir olan işbu râfi‘u’l-kitâb Molla Mehmed b. el-Hâc Ömer nâm kimesneyi hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri gāib-i mezbûrun eşyâsını hıfz için kayyûm nasb u ta‘yîn buyurduklarında ol dahi husûs-ı mezbûru ber-vech-i muharrer kabûl ve merâsimini edâya ta‘ahhüd ve iltizâm eylediğinden sonra mezbûr Molla Mehmed gāib-i mezbûrun eşyâsını zâyi‘ ve telef etmemek üzere Salih Paşa Mahallesi’nde sâkin el-Hâc Halil b. el-Hâc İsmail ve Ahmed Yazıcı b. Ali ve el-Hâc Hüseyin b. el-Hâc Ömer nâm kimesneler kefîl olmalarıyla mâ-vaka‘a bi’t-taleb ketb olundu. Fî 12 min-Cumâdelûlâ sene 1121 Şuhûdü’l-hâl: Yusuf Çelebi b. Abdullah, Hasan Beşe b. Abdullah, Osman Ağa b. Mehmed, Ahmed b. el-Hâc Hüseyin, el-Hâc Ahmed b. Şa‘ban, Mehmed Beşe b. Hüseyin, el-Hâc Süleyman b. Ömer, Mustafa b. Şa‘ban, Ali Çelebi b. İvaz ve gayruhum mine’l-huzzâr.