Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 229 Hüküm no: 219 Orijinal metin no: [29a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Fazıl b. Hacı Ahmed’in, Haremeyn-i şerifeyn mukataacısı Hacı İbrahim Efendi b. Mehmed’den aldığı borca karşılık evini rehin verdiği Mahmiye-i İstanbul’da Yenikapı dâhilinde Çukur Mahallesi sükkânından Halil Fazıl b. el-Hâc Ahmed nâm kimesne meclis-i şer‘-i şerîf-i enverde sâbıkā Haremeyn-i şerîfeyn şerrefehümallâhu te‘âlâ mukāta‘acısı olan el-Hâc İbrahim Efendi b. Mehmed tarafından husûs-ı âti’l-beyânı tasdîka vekîl olduğu İmâm İbrahim Efendi b. Mehmed ve es-Seyyid Abdurrahman Efendi b. es-Seyyid Abdullah şehâdetleriyle şer‘an sâbit olan Mehmed Ağa b. el-Hâc Mustafa mahzarında ikrâr ve takrîr-i kelâm edip müvekkil-i mûmâ-ileyh İbrahim Efendi’ye cihet-i karz-ı şer‘îden yedi yüz on beş guruş deynim olup meblağ-ı mezbûr mukābelesinde mahalle-i mezkûrede vâki‘ bir tarafdan Ali Ağa nâm kimesne mülkü ve bir tarafdan imâma meşrûta vakıf menzil ve bir tarafdan el-Hâc Halil mülkü ve bir tarafdan tarîk-i âm ile mahdûd hâriciye ve dâhiliyede büyût-ı adîdeyi ve kenîf ve bi’r-i mâ ve havluyu müştemil mülk menzilimi cümle müştemilâtıyla müvekkil-i mezbûr İbrahim Efendi’ye târih-i kitâbdan doksan bir gün tamamına değin rehin vaz‘ ve teslîm ol dahi ber-vech-i meşrûh irtihân ve kabûl ve tesellüm ve kabz eyledi inşâallâhi’l-mevlâ ecel-i mezkûr hulûlünde deyn-i mezkûru müvekkil-i mûmâ-ileyhe edâ ve teslîm ve fekk-i rehn etmek üzere ta‘ahhüd eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 15 <> min-Cumâdelûlâ sene 1121 Şuhûdü’l-hâl: Muslu Ağa Silahşor-ı şehriyârî, Mustafa Efendi b. Mehmed, es-Seyyid Abdurrahman Efendi b. es-Seyyid Abdullah, Ali usta-i Bahçe-i Ayvansaray, Pertevzâde Ali Ağa b. Mehmed, İsmail Çelebi b. Mehmed, Mustafa Çelebi [b.] Şa‘ban, Hüseyin b. Hasan ve gayruhum mine’l-huzzâr.