Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 230 Hüküm no: 220 Orijinal metin no: [29a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu Kazaskeri La‘lîzâde Şeyh Mehmed Efendi b. İbrahim Efendi’nin vârislerinden kızı Emine Hanım’ın babasından intikal eden bir evdeki hissesini kardeşleri Seyyid Abdullah ile Seyyid Abdülbâki’ye sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden irsâl olunan Mevlânâ Ali Efendi b. Sunullah mahmiye-i İstanbul’da Çerâğī Hamza Mahallesi’nde sâkin sâbıkā Diyârbekir kādısı olan umdetü’l-mevâli’l-izâm Sabit Alâeddin Efendi’nin menziline varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i nebevî eyledikde mahmiye-i mezkûrede Molla Şeref Mahallesi’nde sâkin iken Anadolu kazaskeri oldukdan sonra vedâ‘-ı âlem-i fânî eden merhûm ve mağfûrun-leh La‘lîzâde eş-Şeyh Mehmed Efendi b. İbrahim Efendi’nin verâseti zevce-i metrûkeleri Şerife Emetullah bt. [29b] es-Seyyid Mes‘ûd Efendi ile kebîr oğulları umdetü’l-müderrisîni’l-kirâm es-Seyyid Abdullah Efendi ve es-Seyyid Abdülbâki Efendi ve kebîre kızı umdetü’l-muhadderât Âmine’ye münhasıra ve tashîh-i mes’eleleri kırk sehmden olup sihâm-ı mezkûreden beş sehmi mezkûre Emetullah’a ve on dörder sehmi mezkûrân es-Seyyid Abdullah Efendi ve es-Seyyid Abdülbâki Efendi’den her birine ve yedi sehmi mezkûre Âmine’ye isâbet ve intikāl eylediği şer‘an zâhir ve müte‘ayyin oldukdan sonra mezkûre Âmine’nin zevci ve tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân olan Mustafa Efendi b. Şa‘ban ve Mehmed Efendi b. Sabit Alâeddin Efendi şehâdetleriyle şer‘an sâbit olan mûmâ-ileyh Sabit Alâeddin Efendi meclis-i ma‘kūd-ı mezkûrda işbu sâhibü’l-kitâb mûmâ-ileyhimâ es-Seyyid Abdullah ve es-Seyyid Abdülbâki Efendi mahzarlarında bi’l-vekâle ikrâr ve takrîr-i kelâm edip müvekkilem mezkûrenin babası müteveffâ-i mûmâ-ileyhin terekesinden olup zikri mürûr eden Molla Şeref Mahallesi’nde vâki‘ iki tarafdan tarîk-i âm ve bir tarafdan Hıfzî Mehmed Efendi mülkü ve bir tarafdan tarîk-i hâs ile mahdûd hâriciyede tabaka-i ulyâda altı bâb oda ve iki sofa ve bir kenîf ve dehlîz ve tabaka-i vustâda beş bâb hüddâm odası ve dehlîz ve kenîf ve süflâda bir oda ve iki ahır ve bir anbar ve bir matbah ve samanhâne ve üç bi’r-i mâ ve cüneyne ve havlu ve dâhiliyede fevkānî dört bâb oda ve bir kârgîr oda ve iki sofa ve kenîf ve hamam ve dehlîz ve tahtânî dört bâb oda ve hamam ve câmekân ve kârgîr matbah ve sofa ve dehlîz ve cüneyne ve havlu ve bi’r-i mâyı müştemil mülk menzilden tashîh-i mezkûr üzere müvekkilem mezkûreye isâbet eden yedi sehm hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyhimâ es-Seyyid Abdullah Efendi ve es-Seyyid Abdülbâki Efendi’ye yedi yüz altmış guruşa bey‘ ve temlîk ve teslîm onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezkûru mûmâ-ileyhimâ yedlerinden tamamen ahz u kabz eyledi baʻde’l-yevm menzil-i mahdûd-ı mezkûrun ber-vech-i meşrûh yedi sehm hisse-i şâyi‘ası dahi mûmâ-ileyhimâ es-Seyyid Abdullah Efendi ve es-Seyyid Abdülbâki Efendi’nin mülk-i müşterâları olup müvekkilem mezkûrenin alâka ve medhali kalmayıp menzil-i mezkûre ve mûrisleri müteveffâ-i mûmâ-ileyhin sâir menkūl ve akār ve evânî-i nuhâsiye ve gayr-ı nuhâsiye ve melbûsât ve mefrûşât ve bi’l-cümle ism-i mâl ıtlâk olunur terekesine müte‘allika âmme-i da‘vâdan mûmâ-ileyhimânın zimmetlerini ibrâ-i âmm-ı râfi‘u’l-hısâm ile ibrâ ve iskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezkûr mahallinde ketb ü tahrîr edip ba‘dehû ma‘an irsâl olunan Halil b. Mehmed ve el-Hâc Hasan b. Osman ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: Mehmed Efendi b. Mustafa el-Müderris, eş-Şeyh İsmail Efendi b. Abdülkerim, Mehmed Efendi b. el-Hâc Mustafa, Abdullah Efendi b. Ahmed, eş-Şeyh Ahmed Efendi b. Hüseyin, Çukadâr Ahmed Beşe b. Ramazan, el-Hâc Ahmed Ağa b. İbrahim, Molla Hasan b. Ahmed, es-Seyyid İbrahim Çelebi b. Mehmed ve gayruhum mine’l-huzzâr.