Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 232 Hüküm no: 221 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. İbrahim ile hanımı Havva bt. Abdullah’ın ortak oldukları evlerini Mısır kadılarından Hacı Mehmed Efendi b. Hacı Ali’ye sattıkları Mahmiye-i İstanbul’da Fethiye Câmi‘-i şerîfi kurbünde Kâtib Muslihiddin Mahallesi sâkinlerinden Mustafa Ağa b. İbrahim ve zevcesi Havvâ bt. Abdullah taraflarından husûs-ı âti’z-zikri ikrâra vekîlleri olan zât-ı mezbûreyi ma‘rifet-i şer‘iyye ile ârifân Hasan Çelebi b. Hüseyin ve Mustafa Çelebi b. Abdülmennan nâm kimesneler şehâdetleriyle şer‘an sâbit olan Hüseyin Çelebi b. Derviş nâm kimesne meclis-i şer‘-i şerîf-i enverde kuzât-ı Mısriye’den işbu râfi‘u’l-kitâb el-Hâc Mehmed Efendi b. el-Hâc Ali nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilân-ı mezbûrânın ale’l-iştirâki’s-seviyy silk-i mülk-i sahîhlerinde münselik olup mahalle-i mezbûrede vâki‘ bir tarafdan baʻzan Rumeli kazâsından Bosnavî Ali Efendi mülkü ve baʻzan Mahmud Ağa tasarrufunda olan vakıf menzil ve bir tarafdan Kasab Hüseyin Çelebi mülkü ve baʻzan ( ) nâm zimmî mülkü ve bir tarafdan Esirci es-Seyyid Mustafa mülkü ve bir tarafdan tarîk-i âm ile mahdûd hâriciyede bir bâb fevkānî oda ve dâhiliyede iki bâb fevkānî oda ve bir sofa ve bir bâb tahtânî oda ve bir kiler ve bir mermer musluk ve bir kenîf ve bi’r-i mâ ve zât-ı eşcâr-ı müsmire ve gayr-ı müsmireli hadîkayı muhtevî mülk menzillerini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh el-Hâc Mehmed Efendi’ye beş yüz elli guruş ile meclis-i akde muzî‘a bir kabza fülûsa bey‘ ve teslîm ve temlîk eylediklerinde ol dahi minvâl-i muharrer üzere iştirâ ve tesellüm ve temellük ve kabz ve kabûl ettiğinden sonra semeni olan meblağ-ı mezbûr beş yüz elli guruşu mûmâ-ileyh el-Hâc Mehmed Efendi yedinden her biri tamamen ahz u kabz eylediklerinden sonra fîmâ-ba‘d menzil-i mahdûd-ı mezkûr mûmâ-ileyh el-Hâc Mehmed Efendi’nin mülk-i müşterâsı ve hakk-ı sırfı olup kat‘â müvekkilân-ı mezbûrânın alâkaları kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Cumâdelûlâ sene 1121 Şuhûdü’l-hâl: el-Hâc Mustafa b. Hüseyin, Mahmud Ağa b. Mehmed, el-Hâc Mehmed, el-Hâc ( ) Çelebi b. el-Hâc Mehmed, Mustafa Çelebi b. Şa‘ban, Ali Çelebi b. İvaz, Mehmed Çelebi b. Abdullah, Hasan b. Mustafa ve gayruhum mine’l-huzzâr.