Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 232 Hüküm no: 222 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun bt. Abdurrahman’ın Koca Mustafa Paşa-yı Atik Vakfı’dan bir handaki sekiz odanın tasarrufuna mani olan diğer odaların sahibi Ahmed Efendi b. Abdurrahman’ın müdahalesinin menedildiği Mahmiye-i İstanbul’da Süleymâniye kurbünde Molla Gürânî Mahallesi’nde sâkine fahrü’l-muhadderât Afife bt. Abdurrahman tarafından husûs-ı âti’l-beyâna vekîl olduğu Mehmed b. Abdurrahman ve Receb b. Ahmed nâm kimesneler şehâdetleriyle sâbit olan işbu râfi‘u’l-kitâb Hüseyin Çelebi b. Hasan nâm kimesne dîvân-ı hazret-i sadr-ı aʻzamîde ma‘kūd mahfil-i kazâda Ahmed Efendi b. Abdurrahman nâm kimesne mahzarında bi’l-vekâle üzerine da‘vâ ve takrîr-i kelâm edip merhûm Koca Mustafa Paşa-yı Atîk Vakfı’ndan olup mahmiye-i mezbûrede Sırt hamamı kurbünde vâki‘ ma‘lûmetü’l-hudûd kârgîr hanın yedinde olan temessük nâtık olduğu üzere cem‘an on altı bâb odasının min-gayrı ta‘yînin nısf hissesini ve bir bâb kapıcı odasının nısfını ve kapı yolunun dahi nısfını icâreteyn-i ma‘lûmeteyn ile müvekkilem mezbûre Afife Hatun tefevvüz ve nısf-ı âharını dahi mezbûr Ahmed Efendi tefevvüz etmişiken mezbûr Ahmed Efendi sekiz bâb mu‘ayyen odasını temessüğe mugāyir müstakillen zabt edip müvekkile-i mezbûre ile müşârekete râzı olmamağla suâl olunup temessük mûcebince zikr olunan on altı bâb odalara sâbıkā iştirâk-i seviyy üzere tasarrufa mezbûr Ahmed Efendi’ye tenbîh olunmak matlûbumdur dedikde isre’l-istintak mezkûr Ahmed Efendi cevâbında mücerred temessükde mârru’z--zikr on altı bâb odadan nısfı olan sekiz bâb odalara mutasarrıf ola deyü benim zabt ettiğim odaları mütevellî bana tefevvüz etmekle müstakillen sekiz bâb mu‘ayyen odasını ben kabz eyledim deyücek tarafeynin temessüklerine nazar olundukda mârru’z--zikr on altı bâb odalar fevkānî ve tahtânî nısfiyet üzere sekizer bâb odasına her biri mutasarrıf ola deyü tasrîh olunup lâkin hudûd zikr olunmayıp ta‘yîn ve tahsîs ve ifrâz bulunmayıp ve mezbûr Ahmed Efendi dahi mazmûn-ı temessüğü ikrâr etmekle temessükleri mûcebince müşâ‘an tasarruflarına tenbîh-birle mâ-vaka‘a bi’t-taleb ketb olundu. Fî 9 min-Cumâdelûlâ sene 1121 Şuhûdü’l-hâl: Fahrü’l-müderrisîni’l-kirâm Mustafa Efendi b. Ali, Mefharü’l-müderrisîni’l-fihâm Ahmed Efendi b. Abdullah, el-Hâc Mustafa Ağa b. Muslihiddin, el-Hâc İbrahim b. Mehmed, el-Hâc Sefer b. Ahmed, Süleyman Çelebi b. Mustafa Efendi, el-Hâc Ahmed b. İbrahim ve gayruhum mine’l-huzzâr.