Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 234 Hüküm no: 224 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Sanan v. Mardiros’un Hüseyin b. Hızır’da kalan demirlerinin kendisine teslim edilmesi Enserci tâifesinden işbu bâ‘isü’s-sifr Sanan v. Mardiros nâm zimmî meclis-i şer‘-i şerîf-i enverde Hüseyin b. Hızır nâm kimesne mahzarında üzerine da‘vâ ve takrîr-i kelâm edip bundan akdem sekiz yüz vakıyye demirimi beynimizde ma‘lûm ücret ile bölmek için mezbûr Hüseyin’e def‘ ü teslîm ol dahi yedimden ahz u kabz eylediğinden sonra zikr olunan demirin yüz elli iki buçuk vakıyyesini bölüp ve bana teslîm ve altı yüz kırk yedi buçuk vakıyyesi mezbûr Hüseyin yedinde bâkī kalmağla hâlâ bâkī kalan altı yüz kırk yedi buçuk vakıyye demiri mezbûr Hüseyin’den taleb ve da‘vâ eylediğimde bana redd ü teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Hüseyin cevâbında kaziyye müdde‘î-i mezbûrun takrîr-i meşrûhu üzere olup kabzını mu‘terif olduğu yüz elli iki buçuk vakıyye demirden bâkī altı yüz kırk yedi buçuk vakıyyesi hâlâ yedimde mevcûddur deyü ikrâr u i‘tirâf etmeğin mûcebince zikr olunan altı yüz kırk yedi buçuk vakıyye demiri müdde‘î-i mezbûr Sanan’a redd ü teslîme mezbûr Hüseyin’e tenbîh olunup mâ-vaka‘a bi’t-taleb ketb olundu. Fî 13 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.