Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 234 Hüküm no: 225 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim ile hanımı Havva bt. Mustafa’nın Ebûbekir Çelebi b. Mustafa’dan satın aldıkları evin bedelinden dolayı birbirlerinin zimmetlerini ibra ettikleri Mahmiye-i İstanbul’da Kâtib Muslihiddin Mahallesi sükkânından Mustafa b. İbrahim nâm kimesne ile zevcesi Havvâ bt. Mustafa nâm hatun taraflarından husûs-ı âti’z-zikre vekîl olduğu Hüseyin b. Mehmed ve İbrahim b. Mustafa nâm kimesneler şehâdetleriyle şer‘an sâbit olan Hüseyin Ağa b. Derviş nâm kimesne meclis-i şer‘-i şerîf-i kavîmde işbu sâhibü’l-kitâb Ebûbekir Çelebi b. Mustafa nâm kimesne mahzarında bi’l-vekâle ikrâr ve takrîr-i kelâm edip bundan akdem mezbûr Ebûbekir Çelebi silk-i mülkinde münselik emlâkinden olup mahmiye-i mezbûrede Tercümân Yunus Mahallesi’nde vâki‘ bir tarafdan Berber Yahya Çelebi menzili ve bir tarafdan Hüseyin b. Zülfikār menzili ve bir tarafdan benim âhar menzilim ve bir tarafdan tarîk-i âm ile mahdûd dâhilen ve hâricen fevkānî ve tahtânî büyût-ı adîde ve bir mikdâr arsa-yı hâliyeyi müştemil mülk menzilini altı yüz doksan guruş semen-i makbûza müvekkillerim mezbûrân Mustafa ve Havvâ’ya iştirâken bey‘ ve teslîm ve temlîk eylediğinde onlar dahi ber-vech-i muharrer iştirâ ve tesellüm ve temellük ve kabz ve kabûl etmişler idi hâlâ müvekkillerim mezbûrân Mustafa ve Havvâ zikri mürûr eden menzile müte‘allika cemî‘ de‘âvî ve mutâlebâtdan mezbûr Ebûbekir Çelebi’nin zimmetini ibrâ ve iskāt eyledik ve mezbûr Ebûbekir Çelebi dahi bize medfû‘u olan meblağ-ı mezbûr altı yüz doksan guruşa müte‘allika âmme-i de‘âvî ve mutâlebâtdan bizim zimmetimizi ibrâ ve iskāt eyledi fîmâ-ba‘d husûs-ı mezbûra müte‘allik birbirimiz ile vechen mine’l-vücûh ve sebeben mine’l-esbâb kat‘â da‘vâ ve nizâ‘ımız yokdur dediler dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 15 min-Cumâdelûlâ sene 1121 Şuhûdü’l-hâl: Mustafa Çelebi b. Hasan, Hüseyin Çelebi b. Mehmed, İbrahim Çelebi b. Mehmed, Hüseyin b. Hasan el-Muhzır, Mustafa Çelebi b. Şa‘ban, Hüseyin b. Süleyman ve gayruhum mine’l-huzzâr.