Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 235 Hüküm no: 226 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebûbekir Çelebi b. Mustafa’nın evini Mustafa b. İbrahim ile hanımı Havvâ bt. Mustafa’ya sattığı Mahmiye-i İstanbul’da Ca‘fer Subaşı Mahallesi sükkânından Ebûbekir Çelebi b. Mustafa nâm kimesne meclis-i şer‘-i şerîf-i enverde işbu sâhibü’l-kitâb Mustafa b. İbrahim ve zevcesi Havvâ bt. Mustafa taraflarından husûs-ı âti’z-zikre vekîl olduğu Hüseyin b. Mehmed ve İbrahim b. Mustafa nâm kimesneler şehâdetleriyle şer‘an sâbit olan Hüseyin Ağa b. Derviş nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup Tercümân Yunus Mahallesi’nde vâki‘ bir tarafdan kendi âhar mülküm ve bir tarafdan Berber Yahya Çelebi mülkü ve bir tarafdan Hüseyin b. Zülfikār mülkü ve bir tarafdan tarîk-i âm ile mahdûd dâhiliyede iki bâb fevkānî kebîr oda ve bir bâb fevkānî sagīr oda ve bir sofa ve dehlîz ve tahtânî bir matbah ve bir kenîf ve bir gasilhâne ve bir mikdâr arsa-yı hâliyeli ve hâriciyede bir bâb tahtânî oda ve bir su bacası ve bir kenîf ve Yahya Çelebi tarafında olan müşterek duvar ve Hüseyin b. Zülfikār tarafında nısfı benim ve nısf-ı âharı mezbûr Hüseyin’in olmak üzere müşterek duvarı muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz doksan guruşa müvekkilân-ı mezbûrân Mustafa ve zevcesi Havvâ’ya ale’l-iştirâk bey‘ ve teslîm ve temlîk eylediğimde onlar dahi ber-vech-i muharrer iştirâ ve tesellüm ve temellük ve kabûl eylediklerinden sonra semeni olan meblağ-ı mezbûr altı yüz doksan guruşu müvekkilân-ı mezbûrân Mustafa ve zevcesi Havvâ yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla müvekkilân-ı mezbûrân Mustafa ve zevcesi Havvâ’nın ale’l-iştirâk mülkleridir keyfe mâ yeşâ’ân ve yehtârân mutasarrıfân olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Cumâdelûlâ sene 1121 Şuhûdü’l-hâl: Es-sâbikūn, es-sâbikūn, es-sâbikūn, es-sâbikūn, es-sâbikūn