Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 236 Hüküm no: 227 Orijinal metin no: [30a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın evlatlık olarak aldığı Havvâ’nın ihtiyaçları için babası Ali b. Mehmed’in ödemesi şartıyla nafaka tayin edildiği Civâr-ı saltanatda Yoros kazâsına tâbi‘ Beykoz nâm karyede sâkine olup zâtı ma‘rifet-i şer‘î ile mu‘arrefe olan Sâliha bt. Abdullah nâm hatun meclis-i şer‘de Ali b. Mehmed nâm kimesne mahzarında ikrâr ve takrîr-i kelâm edip meclis-i şer‘de mevcûde ve takrîben bir yaşında Havvâ’yı tebennî ve terbiye için hâlâ bana teslîm ben dahi ber-vech-i muharrer ahz eyledim lâkin sagīre-i mezbûrenin nafaka ve kisveye eşedd-i ihtiyâcı olmağla kıbel-i şer‘den babası mezbûr Ali üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûrenin nafaka ve kisvesiʼçün tarafeynin rızâları ile mezbûr Ali üzerine târih-i kitâbdan beher yevm altışar akçe nafaka ve kisve-bahâ farz ve takdîr edip meblağ-ı mezbûru sagīre-i mezbûrenin nafaka ve kisve ve sâir levâzımına harc u sarfa ve inde’z-zarûre istidâneye ve lede’z-zafer babası mezbûr Ali üzerine rücû‘a mezbûre Sâliha’ya izin vermeğin mâ-vaka‘a bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: Mehmed b. Ahmed, es-Seyyid Mehmed b. Abdullah, Hasan b. Mustafa, Ali b. Receb, Veli b. Ali ve gayruhum mine’l-huzzâr.