Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 238 Hüküm no: 230 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülgani Bey b. Hasan’ın tımarına dahil Dibektaşı köyünden Sunullah b. Mehmed, Musa b. Ali ve İbrahim b. Abdullah’ın öşür vergisini vermedikleri iddiasıyla açtığı davada iddiasını belgeleyemediğinden talebinin reddedildiği Vilâyet-i Anadolu’da Gölpazar-ı Borlu ahâlîsinden Abdülgani Bey b. Hasan nâm kimesne mahfil-i kazâda Göçünoz kazâsına tâbi‘ Dibektaşı nâm karye ahâlîsinden ashâb-ı hâzihi’l-vesîka Sunullah b. Mehmed ve Musa b. Ali ve İbrahim b. Abdullah nâm kimesneler mahzarlarında takrîr-i da‘vâ edip karye-i mezbûrede vâki‘ Karaman kışlası demekle ma‘rûf ma‘lûmü’l-hudûd tarlalarım tımarım toprağından iken mezbûrlar öşür ve resmini bana edâdan imtinâ‘ ederler suâl olunsun dedikde gıbbe’s-suâl mezbûrûn Sunullah ve Musa ve İbrahim cevâblarında zikr olunan tarlalar bizim tasarrufumuzda olup kadîmü’l-eyyâmdan öşür ve resmini Borlu kal‘ası dizdârına veregelip âhardan kimesne ta‘arruz edegelmeyip ve mezbûr Abdülgani’nin sûret-i defterinde dahi Taşdibek kaydı yokdur dediklerinde fi’l-hakīka mezbûr Abdülgani Bey’in yedinde sened-i şer‘îsi olmadığından mâ‘adâ rakabe-i arz da‘vâsında mezbûrlar hasm-ı şer‘î olmamağla husûmet tevcîh etmeyip rakabe-i arzda hasm kal‘a dizdârı olmağla dizdâr-ı mezbûr ile murâfa‘aya muhtâc olmağın mûcebince mezbûr Abdülgani mezbûrlara bî-vech mu‘ârazadan men‘-birle mâ-vaka‘a bi’t-taleb ketb olundu. Fî-evâsıtı Cumâdelûlâ sene 1121 Şuhûdü’l-hâl: Osman Efendi b. Receb, Hüseyin Beşe b. Mehmed, Mustafa Beşe b. Mehmed, Mehmed Çelebi b. Ömer, Mustafa Çelebi b. Mehmed, Ahmed Beşe b. Muslihiddin, İbrahim Çelebi b. Mehmed, Hasan Halîfe b. Mehmed, Süleyman b. Abdullah ve gayruhum mine’l-huzzâr.