Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 238 Hüküm no: 231 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdullah Ağa b. İbrahim Ağa’nın alacaklıları olduğu Kasap Abdurrahman Beşe b. Hüseyin ile ortağı Hasan Beşe b. Ahmed’in borçlarını Abdullah’ın oğlu İbrahim’e taksitler halinde ödeyecekleri Mahmiye-i İstanbul’da Karabaş Mahallesi’nde sâkin iken bundan akdem fevt olan Abdullah Ağa b. İbrahim Ağa nâm kimesnenin sulbî oğlu İbrahim nâm sagīrin vâlidesi ve tesviye-i emrîçün kıbel-i şer‘den mansûbe vasiyyesi olan Hadice Hatun bt. Abdullah’ın zâtı ba‘de’t-ta‘rîfi’ş-şer‘î meclis-i şer‘-i şerîf-i enverde kasab tâifesinden olup mahmiye-i mezbûrede Çukurbostanı Mahallesi sükkânından işbu hâfızü’l-kitâb Abdurrahman Beşe b. Hüseyin ve şerîki Hasan Beşe b. Ahmed nâm kimesneler mahzarlarında bi’l-vesâye ikrâr ve takrîr-i kelâm edip vasîsi olduğum sagīr-i mezbûr İbrahim’in baba[sı] müteveffâ-i mezbûrdan müntakil mâlından mezbûrân Abdurrahman Beşe ve şerîki Hasan Beşe zimmetlerinde beynlerinde adedi ma‘lûm koyun bahâsından sekiz yüz doksan bir guruş hakkı olmağla meblağ-ı mezbûrdan bi’d-defa‘ât yedi yüz seksen bir guruşunu mezbûrân Abdurrahman ve şerîki Hasan bana def‘ ü teslîm ben dahi yedlerinden sagīr-i mezbûr için bi’l-vesâye ahz u kabz edip meblağ-ı mezbûrdan [yüz] on guruş bâkī kalmağın meblağ-ı bâkī-i mezbûr yüz on guruşu mezbûrân Abdurrahman Beşe ve Hasan Beşe hâlâ edâya kudretleri olmayıp te’cîl ve taksîte tâlib olduklarında ben dahi işbu bin yüz yirmi bir senesinin Cumâdelâhire gurresinden her otuz gün tamamında bana onar guruş vermek üzere târih-i mezbûrdan on bir ay tamamına değin te’cîl ve taksît eylediğimde onlar dahi te’cîl ve taksîti kabûl ve meblağ-ı mezbûru ber-vech-i muharrer edâya ta‘ahhüd eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Cumâdelûlâ sene 1121 Şuhûdü’l-hâl: Mustafa b. Ömer el-Kâtib, Hüseyin b. Hasan, Ahmed Çelebi b. Ali, el-Hâc Mustafa b. Osman, Mustafa Çelebi b. Şa‘ban, Ali b. İvaz, Abdullah b. ( ), Köşeci Hasan Çelebi, Emrullah b. ( ) el-Kâtib ve gayruhum mine’l-huzzâr.