Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 239 Hüküm no: 232 Orijinal metin no: [30b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Mehmed’in Mustafa Bey b. İsmail ile Ali Bey b. Ali’ye olan borçlarını taksitler halinde ödeyeceği Mahmiye-i İstanbul’da Kefeli Mahallesi sükkânından işbu râfi‘u’l-kitâb Ahmed Bey b. Mehmed nâm kimesne meclis-i şer‘-i şerîf-i enverde Mustafa Bey b. İsmail ve Ali Bey b. Ali nâm kimesneler mahzarlarında ikrâr ve takrîr-i kelâm edip cihet-i karz-ı şer‘îden mezbûr Mustafa Bey’e yüz guruş ve mezkûr Ali Bey’e seksen guruş ki cem‘an ikisine min-haysü’l-mecmû‘ yüz seksen guruş deynim olup lâkin hâlâ ve def‘aten edâya iktidârım olmayıp te’cîl ve taksîte tâlib olduğumda târih-i kitâbdan her otuz gün tamamında mezbûr Mustafa Bey’e dört guruş ve mezbûr Ali Bey’e iki guruş verip târih-i mezbûrdan yedi yüz elli gün tamamında mezbûr Mustafa Bey’e ve târih-i mezbûrdan bin gün tamamında mezbûr Ali Bey’e tamamen edâ etmek üzere mezbûrândan her biri te’cîl ve taksît eylediklerinde ben dahi ber-vech-i muharrer kabûl ve müddet-i mezbûre tamamına değin ber-vech-i muharrer mukassaten edâya ta‘ahhüd eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Cumâdelûlâ sene 1121 Şuhûdü’l-hâl: Ali Çavuş b. Abdullah, Mehmed b. Ramazan, Mehmed b. Ahmed, el-Hâc Mustafa b. İbrahim, el-Hâc Hüseyin b. Osman, Salih Efendi b. Abdurrahman, Monla İbrahim b. Derviş, Mustafa Çelebi b. Şa‘ban, Hasan Çelebi b. Abdullah, Ali b. Bâli ve gayruhum mine’l-huzzâr.